Зоир Мирзаев танқидидан сўнг Деҳқонобод ва Шаҳрисабзда ҳам ҳокимликларни ўраб турган панжаралар олиб ташланди

Қашқадарё ҳокими Зоир Мирзаев танқидидан сўнг Деҳқонобод ва Шаҳрисабз тумани ҳокимликларини ўраб турган панжаралар ҳам олиб ташланди. Бу ҳақда туман ҳокимликларининг ахборот хизматлари хабар берди.

Маълум бўлишича, Деҳқонобод ҳокими Зоир Алиқулов ва Шаҳрисабз тумани ҳокими Самад Ҳасанов ҳокимлик биносини ўраб турган панжарални олиб ташлаш ҳақида 16 август куни топшириқ берган. Ва шу куни ҳар иккала ҳокимликда ҳам панжаралар олинмоқда.

Вилоят раҳбари панжарали ҳокимликлар ҳақида сўз юритиб, «Нимага ҳокимлик ёпиқ жой бўлиши керак? Мен вилоят ҳокимлигига чақирилган ҳокимларни ҳар сафар ҳокимлик олдидан олиб киришни буюраман, нимага? Ҳокимлар шу томондан кирса, панжара йўқлигини кўради. Мен ҳокимлик биносига кираётган йўлда панжара йўқ. Буни ақли етган тушунади», — дея ҳокимликларнинг панжара билан ўраб қўйилганини танқид қилганди.

«Дарё» мухбирининг қўшимча қилишича, айни кунда вилоятнинг Чироқчи, Китоб ва Яккабоғ тумани ҳокимликларидаги панжара тўсиқлар олиб ташланмаган.

Эслатиб ўтамиз, аввалроқ Косон туман ҳокимлиги ҳам танқиддан хулоса қилиб, ҳокимлик олдидаги темир панжаларни олиб ташлагани ҳақида хабар берилганди.