Mercedes-Benz EQS электроседанининг янгиланган дастурий таъминоти орқа ўриндиқдаги йўловчилар учун кенг имкониятли ахборот-кўнгилочар дастурларни тақдим этади. Ойига 89 евро тўлаш орқали тетрис, судоку, аэрохоккей ва кўплаб машҳур ўйинлар ўрин олган пакетни ўрнатиш мумкин. Тизим кўп фойдаланувчилар учун мўлжалланган режимни ўз ичига олгани сабаб орқа ўриндиқдаги йўловчиларнинг ҳар бири ўз экранидаги ўйинни бошқара олади, деб хабар беради Motor.
Янги обуначилар учун дастлабки 12 ой давомида ўйинлардан фойдаланиш бепул бўлади. Симсиз янгиланишлар ёрдамида амалга ошириладиган бошқа функциялар қаторидан контурли «подвеска» учун бир неча эффектлар ҳам ўрин олган бўлиб, у электрокарни очиш-ёпиш вақтида фаоллашади, шунингдек, йилига 50 доллар эвазига иккита қўшимча бошқарув режимидан фойдаланиш мумкин бўлади. Ҳайдашни энди ўрганган ҳайдовчилар учун седаннинг текис ҳаракатланишини таъминлайдиган режим ҳам мавжуд — у Sport режимини ўчиради, максимал тезликни соатига 120 километргача чеклайди ва барқарорлаштиргич тизимини ўчириш функциясини блоклайди. Иккинчи мавжуд режим — максимал тезликни соатига 80 километрга қадар тушириш ва ҳайдовчининг профилига кириш имкониятини чекловчи Valet Mode режимидир.
Mercedes-Benz EQS’нинг бошқа янгиланишлари қаторидан овозли бошқарув ёрдамида видеоқўлланмадан фойдаланиш имконияти ўрин олган. Европа бозори учун моделнинг орқа ғилдиракларини бошқариш учун ҳам обуна мавжуд бўлади, АҚШда эса бу каби функция «базавий» нархдан ўрин олади. Германияда ҳашаматли электрокар ҳозирда сотувга чиққан: EQS 450+ версиясини 106 374 еврога, кучлироқ EQS 580 4Маtic’ни эса 135 529 еврога харид қилиш мумкин.
Аввалроқ Mercedes-Benz компанияси Car-to-X Communication тизимини такомиллаштиргани ва йўлда пайдо бўладиган тўсиқлардан огоҳлантирувчи янги функцияни жорий этгани тўғрисида хабар берилганди.
Изоҳ (0)