Mercedes-Benz avtomobillari bir-birini yo‘llardagi to‘siqlardan ogohlantirishni boshlaydi

Mercedes-Benz kompaniyasi Car-to-X Communication tizimini takomillashtirdi va yo‘lda paydo bo‘ladigan to‘siqlardan ogohlantiruvchi yangi funksiyani joriy etdi, deb xabar beradi “Korrespondent.net”.

Shu orqali ayrim avtomobil modellari yo‘l harakati ishtirokchilarini yo‘ldagi to‘siqlar va o‘nqir-cho‘nqirliklar haqida ogohlantirishi mumkin.

Gap yangi avlod C-Class va S-Class seriyasidagi modellar, shuningdek, EQS elektrosedanlari haqida ketmoqda. Ushbu mashinalar yo‘l harakatining boshqa ishtirokchilari xabarlarini generatsiya qilish imkoniyatiga ega.

Yo‘lda biror chuqurlik yoki sun’iy notekislik aniqlangan taqdirda old va orqa “podveska” siqilish hamda tiklanishni qayd etadi.

Ushbu ma’lumot avtomobil ishlab chiqaruvchining bulutli platformasiga uzatilib, u yerda tahlil qilingan ma’lumotlar Car-to-X tizimini qo‘llab-quvvatlaydigan mashinalarga uzatiladi. Yo‘l to‘sig‘iga yetishga 10 soniya qolganida tizim haydovchini displeydagi belgi, shuningdek, ovozli xabarnoma orqali ogohlantiradi.

Bundan tashqari, ushbu mashinalarda yana bir funksiya paydo bo‘lgan — yon shamol assistenti deb ataluvchi Crosswind Assist nomli tarmoqli integratsiya. Uning yordamida yon tomondan kuchli shamol esganida tizim tormoz tizimining ishini nazoratga oladi yoki rul boshqaruviga aralashib, yo‘lda mashinaning tekis harakatlanishini ta’minaydi. Shuningdek, ob-havo sharoiti o‘zgargani to‘g‘risidagi ogohlantirish bulutli servisdan olinib, yo‘l harakati ishtirokchilariga yo‘llanadi.

Avvalroq Mercedes-Benz bir marta quvvatlanish orqali 1200 km yura oladigan elektrokarini namoyish etgani, Xitoyda Mercedes-Maybach’ning eng arzon versiyasi taqdim etilgani to‘g‘risida xabar berilgandi.