«Ўзгидромет» Сирдарёда торнадо кузатилгани ҳақидаги видео юзасидан маълумот берди.
Ижтимоий тармоқларга жойлаштирилган ҳамда «Сирдарёда торнадо» деб номланган видеолавҳа 2021 йилнинг 16 августида Сирдарё вилоятида кузатилган. Лавҳада маҳаллий кучли шамол – шамол йўналиши ўзгариши билан унинг қисқа муддатли кескин кучайиши ва шу билан бирга қуюн самарасининг вужудга келиши тасвирга олинган. Бу маҳаллий тилда гирдоб дейилади.
Таъкидланишича, торнадо ёки қуюн – жуда кучли, ҳаддан ташқари катта тезлик билан айланадиган воронкасимон қуюн бўлиб, тўп-тўп ёмғирли (момақалдироқли) булутларда ҳосил бўлади Пастга томон булутли енг ёки хартум сифатида уйирма ҳосил қилади ва диаметри бир неча ўн ёки юз метр бўлиши мумкин.
Торнадолар ўта ҳалокатли табиат ҳодисасидир. Асосан, тропик ва субтропиклардаги океан ва қуруқлик ўртасида юзага келади.
«Юқоридаги видеода акс этган ҳодисанинг даҳшатли торнадо табиат ҳодисасига алоқаси йўқ. Умуман олганда, Ўзбекистонда торнадо ҳодисаси муқаддам кузатилмаган. Гирдоб (смерч)лар ёз ойларида республиканинг турли ҳудудларида тез-тез кузатилади», – дейилади хабарда.
Бундан аввал Ўзбекистонда ҳафта охирларига бориб ҳаво ҳарорати яна кўтарилиши кутилаётгани ҳақида хабар берилганди.
Изоҳ (0)