Андижон шаҳри марказида янги автобуслар ҳаракати йўлга қўйилади, дея хабар бермоқда Транспорт вазирлиги.
Президент Шавкат Мирзиёевнинг 2021 йилнинг 17–18 июнь кунлари Андижон вилоятига ташрифи чоғида вилоятида транспорт инфратузилмасини янгилаш аҳолига сифатли, арзон транспорт хизмати кўрсатишни ташкил этиш юзасидан мутасадди ташкилот раҳбарларига тегишли топшириқларни берган эди.
Мазкур топшириқлар ижросини таъминлаш вилоятда аҳолига кўрсатилаётган транспорт хизматлари сифатини ошириш, йўловчиларга қўшимча қулайликлар яратиш, шаҳар жамоат транспорти тизимини такомиллаштириш бўйича зарур чоралар кўрилмоқда.
Йўловчи ташиш фаолияти билан шуғулланувчи тадбиркорлик субъектлари томонидан ҳаракат таркибини янгилаган ҳолда йўловчиларга қулай ва хавфсиз хизмат кўрсатишни ташкил этиш масаласига алоҳида эътибор қаратилмоқда.
Хусусан, «Алпомиш мероси» МЧЖ томонидан Хитойнинг Zhongtong bus Company limited корхонаси билан 70 дона замонавий автобусларни харид қилиш бўйича 4 375 000 долларлик шартнома имзоланган.
Шартномага мувофиқ 14 август куни ушбу автобуслардан 20 донаси Андижон вилоятига олиб келинди. Август ойи охирига қадар яна 50 дона автобусни олиб келиш режалаштирилган
Бунинг натижасида шаҳар маркази тўлиқ жамоат транспорти қатнови билан қамраб олинади. Янги автобуслар ҳаракатининг йўлга қўйилиши билан 200 дан ортиқ ишчи ўрни яратилади.
Бундан аввал Тошкентда автобуслар учун алоҳида ҳаракатланиш бўлаги ажратилиб, бекатлар янгиланиши, автобуслар ҳаракатини кузатиш имконини берадиган «Тошкент транспорти» мобил иловаси ишга туширилгани ҳамда Тошкентда 1 августдан бир қанча автобус йўналишлари ўзгартирилиб, янгилари ташкил қилиниши ҳақида хабар берилганди.
Изоҳ (0)