Toyota Corolla дунёдаги энг оммабоп автомобиль номини сақлаб қолмоқда. Марканинг Австралиядаги бўлинмаси яқинда компания 50 миллионинчи моделини сотиб рекорд ўрнатган эди. Бунда Австралия бозори муҳим ролни ўйнаган: биринчидан, Австралия Corolla биринчилардан бўлиб экспорт қилинган мамлакатга айланган (1966 йилда), иккинчидан, маҳаллий бозорда 54 йилдан буён 1,5 миллион дона шу каби машина сотилган, деб хабар беради Motor.
Бугунги кунда Toyota Corolla дунёнинг 150 мамлакатида тақдим этилган бўлиб, Япония, Бразилия, Венесуэла, Хитой, Покистон, Жанубий Африка, Тайван, Таиланд, Вьетнам, Туркия, АҚШ ва Буюк Британиядаги 12 та заводда ишлаб чиқарилади. Статистикага кўра, дунёда ҳар 30 сонияда битта Corolla сотилади.
1966 йилдан буён ишлаб чиқарилаётган ва ҳозирга қадар 12 авлодни алмаштирган модель 1997 йилдан буён тарихда энг кўп сотилаётган автомобиллар рейтингига етакчилик қилган. 2005 йилда Corolla 30 миллион нусхада сотилгани сабаб «Гиннеснинг рекордлар китоби»га киритилган.
Аввалроқ Toyota Land Cruiser 300 нинг айрим версиялари учун навбат тўрт йилга чўзилиб кетгани тўғрисида хабар берилганди. Навбат буюртмалар қабул қилинишидан олдин пайдо бўлган — июль ойидан август бошига қадар 20 мингдан ортиқ ариза келиб тушган.
Изоҳ (0)