Mercedes-Benz компанияси Car-to-X Communication тизимини такомиллаштирди ва йўлда пайдо бўладиган тўсиқлардан огоҳлантирувчи янги функцияни жорий этди, деб хабар беради «Korrespondent.net».
Шу орқали айрим автомобиль моделлари йўл ҳаракати иштирокчиларини йўлдаги тўсиқлар ва ўнқир-чўнқирликлар ҳақида огоҳлантириши мумкин.
Гап янги авлод C-Class ва S-Class сериясидаги моделлар, шунингдек, EQS электроседанлари ҳақида кетмоқда. Ушбу машиналар йўл ҳаракатининг бошқа иштирокчилари хабарларини генерация қилиш имкониятига эга.
Йўлда бирор чуқурлик ёки сунъий нотекислик аниқланган тақдирда олд ва орқа «подвеска» сиқилиш ҳамда тикланишни қайд этади.
Ушбу маълумот автомобиль ишлаб чиқарувчининг булутли платформасига узатилиб, у ерда таҳлил қилинган маълумотлар Car-to-X тизимини қўллаб-қувватлайдиган машиналарга узатилади. Йўл тўсиғига етишга 10 сония қолганида тизим ҳайдовчини дисплейдаги белги, шунингдек, овозли хабарнома орқали огоҳлантиради.
Бундан ташқари, ушбу машиналарда яна бир функция пайдо бўлган — ён шамол ассистенти деб аталувчи Crosswind Assist номли тармоқли интеграция. Унинг ёрдамида ён томондан кучли шамол эсганида тизим тормоз тизимининг ишини назоратга олади ёки рул бошқарувига аралашиб, йўлда машинанинг текис ҳаракатланишини таъминайди. Шунингдек, об-ҳаво шароити ўзгаргани тўғрисидаги огоҳлантириш булутли сервисдан олиниб, йўл ҳаракати иштирокчиларига йўлланади.
Аввалроқ Mercedes-Benz бир марта қувватланиш орқали 1200 км юра оладиган электрокарини намойиш этгани, Хитойда Mercedes-Maybach’нинг энг арзон версияси тақдим этилгани тўғрисида хабар берилганди.
Изоҳ (0)