Toyota Land Cruiser 300’ning ayrim versiyalari uchun navbat to‘rt yilga cho‘zilib ketdi
2-avgust kuni Yaponiyada Toyota Land Cruiser 300 sotuvlari boshlandi. Mahalliy OAVlarning ma’lum qilishicha, talabning ko‘pligi sabab yo‘ltanlamasning talabgir modifikatsiyalarini 2-4 yil kutishga to‘g‘ri keladi. Navbat buyurtmalar qabul qilinishidan oldin paydo bo‘lgan — iyul oyidan avgust boshiga qadar 20 mingdan ortiq ariza kelib tushgan. Gap bu yerda oldindan to‘lovi amalga oshirilgan avtomobillar haqida ketmoqda, deb yozadi Motor.
Yaponiyadagi yangi Land Cruiser 300’ni 5,1 million iyenaga (46,7 ming dollar) xarid qilish mumkin. Tanlov uchun bir nechta modifikatsiya taklif etilmoqda: 409 ot kuchiga ega 3,5 litrli V6 benzin motori va 309 ot kuchiga ega 3,3 litrli V6 benzin dvigatelli. Ularning ikkisi ham 10 pog‘onali avtomat uzatmalar qutisi yordamida boshqariladi. Yo‘ltanlamas besh va yetti kishiga mo‘ljallangan salonga ega. Jurnalistlar aynan qaysi versiyaga talab yuqori bo‘layotganiga oydinlik kiritmagan.
Avvalroq Toyota Land Cruiser 300’ning yaponiyalik mijozlari uchun mashina xarid qilinganidan keyin, bir yil davomida ularni sotishga taqiq qo‘ygan. Avtomobil ishlab chiqaruvchi buni yo‘ltanlamaslarning ommaviy ravishda xorijga, xususan, texnikalar importiga cheklov o‘rnatilgan mintaqalarga chiqib ketishi bilan izohlamoqda.
Cheklovlar avtomobillar uchun oldindan amalga oshirilgan buyurtmalarga ham taalluqli: agar diler shartnoma olib-sotish maqsadida tuzilganidan xabar topsa, uni bekor qilishga haqli.
