Хитой Литвадаги элчисини чақириб олаётганини эълон қилди. Бу ҳақда мамлакат Ташқи ишлар вазирлиги маълум қилган, дея хабар берди «ТАСС». Мазкур қарорга Вильнюснинг Тайвань ваколатхонасини очишни режалаштиргани сабаб бўлган.
Хитой ТИВ эълон қилган хабарда ХХРнинг огоҳлантиришларига қарамай Литва ҳукуматининг Тайвань маъмуриятига ўз ваколатхонасини очишга рухсат бергани, дипломатик огоҳлантириш ва тақдимномаларни назар-писанд қилмагани қайд этилган.
«Хитой ҳукумати ушбу қарорга ўз норозилигини билдиради ва Литвадаги элчисини чақириб олади», — дейилади вазирлик баёнотида.
Шунингдек, Пекин Литва ҳукуматига мурожаат қилиб Хитойдаги элчисини жавоб тариқасида Вильнюсга қайтаришни сўраган.
Пекин Вильнюснинг ҳаракатларини икки давлат ўртасидаги муносабатлар ўрнатилишига тўсқинлик қилиши ва Хитой суверенитети ҳамда ҳудудий яхлитлигига зарар етказишини қайд этган.
Литва Ташқи ишлар вазирлиги 20 июлда Тайваннинг ёз охирига қадар мамлакатда ваколатхона очмоқчилигини эълон қилган. Хитойдаги орол маъмурияти вакили Цай Инвэнь ҳам ушбу ахборотни тасдиқлаган. Март ойида Литва ҳукумати кузда Тайванда савдо-иқтисодий ваколатхона очмоқчи эканлигини билдирган. Хитой ТИВ ушбу режаларни қоралаган ва бошқа мамлакатларнинг ҳам Тайвань билан тўғридан-тўғри алоқа ўрнатишга уринишига қарши эканлиги ҳақида баёнот берган.
1949 йилда фуқаролар урушида мағлуб бўлган Чан Кайши (1887—1975) раҳбарлигидаги Гоминдана кучларининг омон қолган қисми Тайванга қочган ва ҳудуд ўз администрацияси томонидан бошқарилади. Тайвань шундан буён ўз байроғи ва коммунистлар бошқарувга келгунигача алоҳида давлат бўлган Хитой Республикасидан қолган бошқа рамзларини сақлаб қолган. Пекин оролни Хитой провинцияларидан бири деб ҳисоблайди.
Изоҳ (0)