АҚШнинг Нью-Йорк штати губернатори Эндрю Куомо шилқимликда айбланаётгани туфайли истеъфо берди. Бу ҳақда NBC News хабар қилди.
«Менимча, ҳозирги шароитдан келиб чиқиб, бир чеккага ўтиш ва ҳукуматга яна маъмурият бўлиш имкониятини яратиш энг яхши ёрдам бўлади деб ўйлайман», — деган губернатор.
Куомо 14 кундан кейин лавозимини тарк этади. Штатдаги кейинги, 2022 йилда ўтадиган сайловларга қадар вице-губернатор Кэти Хокул бошқарувни ўз қўлига олади. У Нью-Йорк штатининг илк аёл раҳбарига айланади.
Август бошида Нью-Йорк прокуратураси назоратидаги тергов ишлари бошланган ва жараён давомида Эндрю Куомонинг 11 нафар аёлга нисбатан шилқимлик қилгани аниқланган. Амалдор мазкур ишларга алоқадорлигини инкор қилган.
АҚШ президенти Жо Байден ҳам Куомодан истеъфога чиқишни сўраган. Нью-Йорк штати қонунчилик кенгаши губернаторга импичмент эълон қилиши мумкинлигини билдирган. Куомо нима бўлган тақдирда ҳам ўз ўрнини бўшатишни истамаётганди.
Куомо 2011 йилдан бери Нью-Йорк губернатори лавозимида ишлаб келаётганди ва энг ёрқин демократ-сиёсатчилардан бири эди. Унинг навбатдаги губернаторлик муддати 2022 йилнинг ноябрь ойида якунига етиши кутилаётганди.
Аввал Нью-Йорк аҳолисига коронавирусга қарши эмланиш эвазига 100 доллардан тўланиши ҳақида хабар берилганди.
Изоҳ (0)