7 август куни ижтимоий тармоқларда журналист Феруза Нажмиддиновани обрўсизлантиришга қаратилган видео тарқалди. Ички ишлар вазирлиги матбуот котиби Шоҳрух Ғиёсовнинг ёзишича, мазкур ҳолат бўйича суриштирув ҳаракатлари олиб борилган ва видеода тасвирланган фуқаролар шахсига аниқлик киритилган.
Таъкидланишича, Тошкент шаҳрининг Олмазор туманида жойлашган кўп қаватли уйларнинг бирида, балконда тасвирланган одамлар икки фарзандли, расмий никоҳдаги оила, эр-хотин, чет эл фуқаролари бўлиб, Тошкент шаҳрида тадбиркорлик фаолияти билан шуғулланиб, мазкур хонадондан расмий ижарада фойдаланиб келган. Улар томонидан ҳеч қандай қонун бузилиш ҳолатлари аниқланмаган. Ушбу оиланинг шахсий ҳаёти тасвирланган видеолавҳани ижтимоий тармоқларда тарқалишига сабабчи бўлган фуқаронинг ҳаракатлари ҳуқуқий баҳоланади.
«Видеолавҳани ясаб, ижтимоий тармоқларда тарқатиш орқали журналистнинг обрўсини тўкишга ҳаракат қилган фуқароларни аниқлаш бўйича тезкор тадбирлар давом этмоқда. Мазкур ҳолат юзасидан Жиноят кодексининг 139-моддаси (туҳмат) 3-қисми, ‘г’ банди ҳамда 141-прим (фуқароларнинг тенг ҳуқуқлилигини бузиш) 2-моддаси 2-қисми, ‘в’ банди бўйича жиноят иши қўзғатилган», — деб ёзади ИИВ матбуот котиби.
Таъкидлаш керакки, журналистни обрўсизлантиришга қаратилган ушбу ҳолат юзасидан Олий Мажлис Сенати, Ахборот ва оммавий коммуникациялар агентлиги, Ўзбекистон журналистлари ижодий уюшмаси, Миллий масс-медиани қўллаб-қувватлаш ва ривожлантириш жамоат фонди, «Юксалиш» умуммиллий ҳаракати расмий баёнот берди, қатор журналистлар муносабат билдирди. Ўзбекистон журналистлари ижодий уюшмаси раиси Олимжон Ўсаровнинг маълум қилишича, Olmazor City’даги ҳолатни тасвирга олган фуқаронинг ҳам шахси аниқланган. Презиндент матбуот котиби Шерзод Асадов журналист билан боғлиқ ҳолат юзасидан баёнот бериб, ушбу ҳаракат Президентнинг шахсан ўзи кафолатлаётган сўз эркинлигига таҳдид сифатида қабул қилинишини айтган.
Изоҳ (0)