7-avgust kuni ijtimoiy tarmoqlarda jurnalist Feruza Najmiddinovani obro‘sizlantirishga qaratilgan video tarqaldi. Ichki ishlar vazirligi matbuot kotibi Shohrux G‘iyosovning yozishicha, mazkur holat bo‘yicha surishtiruv harakatlari olib borilgan va videoda tasvirlangan fuqarolar shaxsiga aniqlik kiritilgan.
Ta’kidlanishicha, Toshkent shahrining Olmazor tumanida joylashgan ko‘p qavatli uylarning birida, balkonda tasvirlangan odamlar ikki farzandli, rasmiy nikohdagi oila, er-xotin, chet el fuqarolari bo‘lib, Toshkent shahrida tadbirkorlik faoliyati bilan shug‘ullanib, mazkur xonadondan rasmiy ijarada foydalanib kelgan. Ular tomonidan hech qanday qonun buzilish holatlari aniqlanmagan. Ushbu oilaning shaxsiy hayoti tasvirlangan videolavhani ijtimoiy tarmoqlarda tarqalishiga sababchi bo‘lgan fuqaroning harakatlari huquqiy baholanadi.
“Videolavhani yasab, ijtimoiy tarmoqlarda tarqatish orqali jurnalistning obro‘sini to‘kishga harakat qilgan fuqarolarni aniqlash bo‘yicha tezkor tadbirlar davom etmoqda. Mazkur holat yuzasidan Jinoyat kodeksining 139-moddasi (tuhmat) 3-qismi, ‘g’ bandi hamda 141-prim (fuqarolarning teng huquqliligini buzish) 2-moddasi 2-qismi, ‘v’ bandi bo‘yicha jinoyat ishi qo‘zg‘atilgan”, — deb yozadi IIV matbuot kotibi.
Ta’kidlash kerakki, jurnalistni obro‘sizlantirishga qaratilgan ushbu holat yuzasidan Oliy Majlis Senati, Axborot va ommaviy kommunikatsiyalar agentligi, O‘zbekiston jurnalistlari ijodiy uyushmasi, Milliy mass-mediani qo‘llab-quvvatlash va rivojlantirish jamoat fondi, “Yuksalish” umummilliy harakati rasmiy bayonot berdi, qator jurnalistlar munosabat bildirdi. O‘zbekiston jurnalistlari ijodiy uyushmasi raisi Olimjon O‘sarovning ma’lum qilishicha, Olmazor City’dagi holatni tasvirga olgan fuqaroning ham shaxsi aniqlangan. Prezindent matbuot kotibi Sherzod Asadov jurnalist bilan bog‘liq holat yuzasidan bayonot berib, ushbu harakat Prezidentning shaxsan o‘zi kafolatlayotgan so‘z erkinligiga tahdid sifatida qabul qilinishini aytgan.
Izoh (0)