COVID-19 мавсумий шамоллашга айланиб қолади, Эронда коронавирусдан ўлимлар бўйича рекорд қайд этилди. Коронахабарлар
Жонс Ҳопкинс университети маълумотларига кўра, дунёда коронавирусга чалинганлар сони 202 780 177 кишига етди, шуларнинг 4 295 418 нафари вафот этган. Касалланганлар сони бўйича АҚШ (35,7 миллион киши), Ҳиндистон (31,9 миллион), Бразилия (20,1 миллион), Россия (6,38 миллион) ва Франция (6,37 миллион) етакчилик қилмоқда.
Яқин йиллар ичида коронавирус мавсумий шамоллашга айланади, у одамларда енгил шаклда ва симптомсиз кечади, ҳаммасидан устун келувчи штамм пайдо бўлганидан кейин эса унинг эволюцияси секинлашади. Бу ҳақда Норидж тиббиёт мактаби профессори Пол Хантер маълум қилди.
Хантернинг фикрича, одамлар COVID-19’га чалинишда давом этади. Унинг сўзларига кўра, вакциналар вирус тарқалишини вақтинчалик тўхтатиб туради, аммо тезда уларнинг самарадорлиги, умуман олганда, пасаяди. Аммо шу билан бирга, эмланиш касалликнинг оғир кечиши ва ўлимлар олдини олади. «Жамоавий иммунитетга ҳеч қачон эришилмайди, бироқ биз иммунитет ва инфекциялар ўртасидаги бошқарилувчи мувозанатни топамиз», — деб ҳисоблайди британиялик профессор.
Унинг фикрига кўра, ҳукмрон штамм пайдо бўлганидан кейин вируснинг тезкор мутацияси секинлашади. «Дельта штамм шундай ҳукмрон турга айланиши мумкин», — деди у.
Эронда 8 август ҳолатига, ўтган бир кеча-кундузда 542 киши COVID-19 оқибатида вафот этган — бу ушбу мамлакатда пандемия бошидан буён кузатилган энг юқори кўрсаткич.Worldometer статистик сайти маълумотларига кўра, кунлик ўлим ҳолатлари бўйича бундан аввалги максимал кўрсаткич 2020 йил ноябрида қайд этилган, ўшанда 483 киши вафот этган эди.
Шу тариқа, Эронда коронавирус қурбонларининг умумий сони 94 мингга етди.
Бундан ташқари, мамлакатда бир кунда 39 619 та касалланиш ҳолати аниқланди, шуларнинг 4,1 минг нафари касалхонага ётқизилган.
Эронда бутун пандемия даврида жами 4,1 миллион кишида вирус қайд этилган.
Хитойнинг Ухань шаҳрида 11,28 миллиондан ортиқ фуқародан коронавирусга тест олинди, бу шаҳарнинг деярли бутун аҳолиси демакдир. Шунча одамни тестдан ўтказиш учун тўрт кун керак бўлди.ПЗР-тест ёрдамида тўққиз кишида вирус аниқланди, уларнинг барчаси карантинга юборилди.
Хитой ҳукумати мамлакатда инфекция тарқалишини тўхтата олмаяпти. Хитой Соғлиқни сақлаш давлат қўмитасининг маълумотларига кўра, 8 август куни Хитойда 125 кишида коронавирус аниқланган, улардан 94 нафари мамлакат ичида: Хенан провинциясида — 41, Сзянсу вилоятида — 38, Хунан вилоятида — 12, ва Хубэй вилоятида — 3 киши.
8 август куни Исроилда коронавирус билан боғлиқ янги чекловлар кучга кирди. Ҳукумат шу тариқа дельта штаммнинг тарқалишини секинлаштиришга уринмоқда. Энди Исроилда очиқ жойларда одамлар гавжум пайтда ниқоб тақиш мажбурий бўлди.Чора-тадбирлар COVID-19’га қарши вакцина олгани, вирус билан касалланиб ўтгани ёки яқинда манфий натижали тест топширгани исботини тақдим эта олмайдиган одамлар учун ёпиқ иншоотларга кириш чекланишини назарда тутади.
Очиқ ҳавода, 100 дан ортиқ одам тўпланадиган жойларда ниқоб тақиш талаб қилинади. Иш жойларида ходимлар сони кўпи билан 50 фоиз этиб чекланади. Қоидаларга риоя қилинишини полиция назорат қилиб боради.
