Президентликка номзод сифатида кўрсатилган Нарзулло Обломуродов пойтахтдаги дарахт кесилиши билан боғлиқ воқеани ўрганди

Telegram’да Тошкент шаҳрининг Учтепа туманидаги кўп қаватли уйлар олдида дарахт кесилаётгани ва бунга ҳудуд аҳолиси норозилик билдиргани акс этган видео тарқалди. Ўзбекистон Экологик партияси ахборот хизмати раҳбари Акбар Абдураимовнинг «Дарё»га маълумот беришича, мазкур ҳолат Ўзбекистон президентлигига номзод сифатида кўрсатилаётган Нарзулло Обломуродов томонидан назоратга олинган.

Таъкидланишича, видеолавҳа ортидан ўрганиш олиб бориш мақсадида Ўзбекистон Экологик партияси Марказий Кенгаши ижроия қўмитаси раиси Нарзулло Обломуродов бошчилигида масъуллар воқеа юз берган манзилда бўлган.

«Учтепа туманидаги 24-мавзе 28, 29-уйлар олдида ноқонуний дарахт кесишга уринаётган шахснинг жамоатчилик томонидан тўхтатиб қолингани акс этган видеолавҳа юзасидан жорий йилнинг 8 август куни ўрганиш ишлари олиб борилиб, бу ерда истиқомат қилаётган аҳоли вакиллари билан учрашув ўтказилди», — дейди партия матбуот котиби Акбар Абдураимов.

Аниқланишича, туманнинг Изза кўчасидаги 219-уйда яшовчи Б.Даминов аҳоли яшаш ҳудудида қурилиш қилиш мақсадида ёлланма ишчи жалб қилиб, ҳудуддаги бир туп диаметри 39,4 сантиметр бўлган сафора дарахтини кесмоқчи бўлган. Бироқ аҳоли вакиллари томонидан тўхтатиб қолинган.

Қайд этилишича, аҳоли норозилигига сабаб бўлган мазкур ҳолат Ўзбекистон Экологик партияси томонидан назоратга олинган бўлиб, назорат ишларига экология инспекцияси ҳамда профилактика инспектори жалб этилди. Ушбу масалада, бугун 9 август куни жамоатчилик эшитуви ҳам ўтказилади.

«Ўзбекистон Экологик партияси она табиатнинг бир бўлаги бўлган дарахтларнинг кесилишини кескин қоралайди ва Учтепа тумани ҳокимлиги, мутасадди ташкилотларга мурожаат қилиб, мазкур вазиятда аҳоли фикрини инобатга олган ҳолда масалани қайта кўриб чиқишни сўрайди», — дейди партия матбуот котиби.

Эслатиб ўтамиз, аввалроқ Ўзбекистонда ноқонуний дарахт кесиш ҳолатлари энг кўп кузатилган вилоятлар номи маълум бўлганди. 2021 йилнинг бошидан дарахт ва буталарнинг ноқонуний кесилиши ва шикастлантирилиши билан боғлиқ ҳолатлар ҳудудлар кесимида таҳлил этилганда энг кўп Қорақалпоғистон Республикаси (1 065 та), Самарқанд (609 та), Қашқадарё (534 та), Навоий (349 та), Тошкент (344 та) вилоятлари ҳиссасига тўғри келган.