Катта Фарғона каналига 29 ёшли йигит чўкиб кетгани айтилмоқда. Қидирув ишларига битта ғаввос жалб этилган

Фарғона вилояти Риштон тумани Дўтир қишлоғида 29 ёшли йигит Катта Фарғона каналига чўкиб кетди. Бу ҳақда Facebook’да Баҳодир Элибоев исмли фойдаланувчи маълум қилди.

Таъкидланишича, йигит дарёда чўмилмоқчи бўлган ва номаълум сабабларга кўра чўкиб кетган. Элибоевнинг ёзишича, йигитнинг чўкиб кетганига етти кун бўлган ва уни қидириш билан асосан қишлоқ аҳолиси шуғулланмоқда.

«Биргина ғаввос келган, каттагина каналнинг лойқа сувлари орасидан излаш учун атиги биргина ғаввос! Барака топсин, астойдил қидираётган экан ёлғиз бўлса ҳам. Аввало, ҳеч кимда бундай воқеа бўлмасин, мабодо, сувда йўқолган йигит қайсидир раҳбар, боринг ана, қайсидир амалдорнинг ўғли бўлса, нима бўларди? Канал суви қуритиларди! Жа бўлмаса, суви пасайтирилиб, ўнтача ғаввос ташланарди излашга. Нотўғри бўлса, гапиринглар.

Биз қачонки дўтирлик ҳамюртимизни менинг жигарим, ўзимнинг ҳамқишлоғим деб қабул қилмас эканмиз, бирдамлик ҳақида гапиришга эрта. Умуман олганда эса, биз ҳеч қачон бировнинг дардини ўзимники деб қабул қилишни ўрганолмаймиз», — деб ёзади фойдаланувчи.

Эслатиб ўтамиз, 2021 йилнинг март ойида Катта Фарғона каналида чўкиб кетган ўсмир йигит мурдаси икки ойдан ортиқ вақт ўтиб топилганди.