«Nemolchi.uz» манбасида Миробод туманида вояга етмаган қизга нисбатан содир этилган жиноят ҳақида хабар эълон қилинди. Тошкент шаҳар ИИББ хабар қилишича, икки нафар гумонланувчилар жавобгарликдан қутулиб қолгани ҳақидаги хабар ҳақиқатдан йироқ. Мазкур факт асосида қуйидагилар маълум қилинган.
Миробод тумани ИИО ФМБга келиб тушган хабарга кўра, 2021 йил 27 апрель куни 8-синф ўқувчиси 2006 йилда туғилган вояга етмаган қизга нисбатан дастлаб 1991 йилда туғилган А.Х. томонидан, кейинчалик унинг икки нафар таниши – М.М. ва Б.Г. томонидан жинсий турдаги жиноят содир этилгани тўғрисида хабар келиб тушган.
Мазкур факт бўйича 2021 йил 30 апрель куни гумонланувчиларга нисбатан Жиноят кодексининг 128-моддаси (ўн олти ёшга тўлмаган шахс билан жинсий алоқа қилиш) бўйича жиноят иши қўзғатилган.
5 май куни А.Х.га нисбатан Жиноят кодексининг 128-моддасида назарда тутилган жиноятни содир этганликда айблов тақдим этилиб, қамоққа олиш эҳтиёт чораси қўлланилган.
М.М. ва Б.Г. терговдан яширингани сабабли 2021 йилнинг 20 май куни жиноят ишининг уларга нисбатан қўзғатилган қисми алоҳида юритиладиган бўлди.
А.Х.га нисбатан қўзғатилган иш бўйича тўпланган ҳужжатлар Миробод тумани жиноят ишлари бўйича судига йўналтирилди.
1 июнь куни иккала фуқаролар ҳам қўлга олиниб, гумонланувчилар тариқасида жиноят ишига жалб қилинди.
2021 йилнинг 30 июнь куни М.М. ва Б.Г.га нисбатан Жиноят кодексининг 128-моддаси бўйича айблов тақдим этилди. Шу куннинг ўзида дастлабки тергов якунланиб, жиноят иши судга оширилди.
Тергов органи томонидан айбланувчиларнинг айбини исботловчи барча далиллар тўпланди, якуний баҳо суд томонидан берилади.
Бундан аввал Бухорода 14 ёшли қизни зўрлаб келган чўпон 3 йилга озодликдан маҳрум қилингани, Навоийда мактаб ўқувчиси ҳомиладор бўлиб қолгани ҳамда Тошкент вилоятида 14 ёшли қизнинг номусига тегганликда гумонланаётган шахс қамоққа олингани ҳақида хабар берилганди.
Изоҳ (0)