Япониянинг Токио шаҳри мезбонлик қилаётган Олимпия ўйинларида ўзбекистонлик спортчилар 6 август кунги чиқишларини якунлади.
Каноэда эшкак эшиш
Жуфтлик баҳсларида Ўзбекистон шарафини ҳимоя қилаётган Дилноза Раҳматова ҳамда Нилуфар Зокирова 500 метр масофага ўтказилган саралаш баҳсларида 2:04.854 дақиқа вақт сарфлаб, тўртинчи ўринни эгаллади ва чорак финалда қатнашадиган бўлди. Жуфтлик чорак финалда 2:04.450 дақиқада иккинчи бўлиб маррага етиб келди ва ярим финал йўлланмасига эга чиқди. 7 август куни Раҳматова ва Зокирова финал йўлланмаси учун баҳс олиб боради.
Бадиий гимнастика
Коронавирус сабаб кўпкураш баҳсларида қатнаша олмаган Сабина Тошкенбоева ўрнини Екатерина Фетисова эгаллади. Беллашувлар бир кун қолганда чиқиш қилишини билган Фетисова кутилганидек яхши натижа қайд эта олмади ва 24-ўринни эгаллади.
Эркин кураш
Рио—2016 Олимпиадаси совриндори Магомед Ибрагимов (-97 кг) дастлабки беллашувда туркиялик Сулаймон Караденизга ютқазиб қўйди. Ўз навбатида Карадениз финал йўлланмаси эга чиқолмади ва Ибрагимов учун Олимпия ўйинлари якунланди
Яна бир эркин курашчи Бекзод Абдураҳмонов (-74 кг) бронза медали учун ўтиш баҳсида Гвинея-Биссау вакили Аугусто Миданани таслим этди. Бекзод бронза медали учун қозоғистонлик Данияр Кайсановга қарши гиламга чиқди ва рақибига ҳеч қандай имкон қолдирмади.
Мавзуга доир: Токио Олимпиадаси совриндори Бекзод Абдураҳмонов ва Ўзбекистон байроқдори Нигора Турсунқулова турмуш қуради
Замонавий бешкураш
Ушбу спорт турида Олимпия ўйинларида қатнашган илк ўзбекистонлик Алисе Фахрутдинова умумий 1165 очко тўплаб, 30-поғонадан жой олди.
7 август куни эркаклар ўртасидаги баҳсларда Александр Савкин Ўзбекистон шарафини ҳимоя қилади.
Изоҳ (0)