КХДР етакчиси Ким Чен Иннинг боши орқасида қандайдир доғлар ёки кичкина «пластир» ёпиштирилган ҳолда тушган фотосуратлари Жанубий Корея матбуоти ва бошқа кузатувчиларнинг эътиборини тортди. Бу ҳақда биринчи бўлиб Жанубий Кореянинг NK News ахборот сайти ёзди, сайтга Ким Чен Иннинг июль ойи охирида олинган бир нечта фотосуратлари жойлаштирилди.
Баъзи суратларда Шимолий Корея раҳбарининг боши орқасида яшил доғлар борлигини, эҳтимол бу жой кўкариб қолганини кўриш мумкин. Бошқа фотосуратларда Ким Чен Иннинг бошидаги кўкарган жой устига майда бинт ёки пластир ёпиштирилган. NK News ёзишича, июнь охиридаги суратларда КХДР раҳбарининг бошида доғлар бўлмаган.
Хорижий кузатувчилар Ким Чен Иннинг суратлари орқали унинг соғлиғи тўғрисида хулоса чиқаришга биринчи марта уринаётгани йўқ.
Июнь ойининг бошида Ким Чен Ин бир ойдан буён биринчи марта жамоатчилик олдида пайдо бўлиб, Меҳнат партиясининг саккизинчи Марказий қўмитаси сиёсий бюроси мажлисларини ўтказди. Оммавий ахборот воситалари таъкидлашича, ушбу учрашувдан олинган фотосуратларда Шимолий Корея раҳбарининг сезиларли даражада озиб кетгани акс этган. Хусусан, Ким Чен Ин қўл соати боғичини одатдагидан кўра тортиброқ боғлаганини кўриш мумкин.
Кейинроқ Шимолий Корея телевидениеси Ким Чен Иннинг озиб кетганини тан олди. Телевидениеда унинг соғлиғи Пхеньяндагиларни ташвишга солаётгани ҳақида ҳикоя қилувчи интервью пайдо бўлди.
Изоҳ (0)