3 август куни Ўзбекистон Президенти раислигида бўлиб ўтган видеоселектор йиғилишида республикадаги шароити оғир бўлган маҳаллаларни ҳар томонлама ривожлантириш масалаласига ҳам тўхтаб ўтилган. Бу ҳақда «Gazeta.uz» хабар берди.
Маълум қилинишича, Шавкат Мирзиёев республикадаги энг оғир шароитдаги маҳаллаларга 100 миллион доллар ажратиш бўйича топшириқ берган. «Қарорга бугуноқ қўл қўйиб беришга тайёрман», — деган давлат раҳбари.
Қолаверса, бош вазирнинг биринчи ўринбосари Очилбой Раматов, транспорт вазири Илҳом Маҳкамовга йил якунигача камида 100 та янги йўналишлар ташкил этиб, жамоат транспорти етиб бормаган 1113 та маҳаллани ҳам қамраб олиш бўйича топшириқ берилган.
Бундан ташқари, йиғилишда мутасаддиларга 9 ой якунида бюджетга 93 триллион сўм солиқ ва 23 триллион сўм божхона тушумларини таъминлашга оид вазифалар берилган.
«Нурмуратов [Марказий банк раиси Мамаризо Нурмуратов — таҳр.] йил якунига қадар иқтисодиётга ажратилган кредит ҳажмини 135 триллион сўмга етказиш, шундан оилавий тадбиркорликни ривожлантириш дастурлари доирасида 9 триллион сўм кредитлар ажратишни таъминласин», — дейди Президент.
Бош вазир ўринбосари, Иқтисодий тараққиёт ва камбағалликни қисқартириш вазири Жамшид Қўчқоров йил якуни бўйича иқтисодий ўсишни 6,5 фоиз даражадан кам бўлмаслиги учун тармоқ ва ҳудудлар кесимида ҳафталик назорат ўрнатиб, мавжуд муаммоларни ҳал этиш ва қўшимча имкониятларни ишга солиш чораларини кўриб бориши кераклиги айтилган.
Аввалроқ Шавкат Мирзиёев йиллик инфляция даражаси 10 фоиз доирасида бўлишини таъминлаш вазифасини қўйгани тўғрисида хабар берилганди.
Изоҳ (0)