Қашқадарё ҳокими Зоир Мирзаев қабулида бўлиб, фарзанди томонидан эплаб пул сўраёлмаганликда айбланган ва қизидан тарсаки еган 70 ёшли онахонга ҳимоя ордери берилди. Бу ҳақда вилоят ИИБ ахборот хизмати хабар қилди.

Фото: Қашқадарё вилоят ИИБ

Таъкидланишича, ИИБ ходимлари онасига руҳий ва жисмоний тазйиқ ўтказган Қарши шаҳри «Шайхали» МФЙ 18-ётоқхонада яшовчи Озода Ҳимматова хонадонида бўлиб, онаси Айташ Менгаевага ҳимоя ордерини топширган.

Қайд этилишича, вилоят ҳокими Озода Ҳимматовага 70 ёшли онасини Саховат уйига топшириш ҳақида таклиф берган. Аммо ҳоким томонидан айтилган бу таклиф Озода Ҳимматова томонидан қандай қаршилангани очиқланмаган.

Фото: Қашқадарё вилоят ИИБ

«Дарё» мухбири билан суҳбатлашган Қарши шаҳар ҳокимлиги масъули Ораста Тошева 70 ёшли онахонни Яккабоғ туманидаги Саховат уйига топшириш ва давлат ғамхўрлигига олиш бўйича ҳаракатлар бошланганини маълум қилди.

«МФЙ масъуллари судга беришяпти. Суд қандай қарор чиқарса, шу бўлади. Онахоннинг Саховат уйига кетиш-кетмаслиги суд қарорига боғлиқ», — дейди Ораста Тошева.

Фото: Қашқадарё вилоят ИИБ

Эслатиб ўтамиз, ижтимоий тармоқларда Қашқадарё ҳокими Зоир Мирзаев қабулида бўлган онахон номаълум сабабга кўра қизи томонидан таҳқирлангани тасвирланган видео тарқалгач, «Менинг юртим» телеканалининг «Марказий студия» дастури орқали вазиятни изоҳлаган Озода Ҳимматова тарқалган видео монтаж эканлигини таъкидлаган.