YuNESKO O‘zbekistonga Shahrisabz tarixiy markazini tiklash uchun yana bir yil muddat berdi

YuNESKO Jahon merosi qo‘mitasi karantin cheklovlari sharoitida O‘zbekiston tomondan barcha vazifalarni amalga oshirish uchun ko‘proq vaqt talab etilishini inobatga olgan holda “Shahrisabz tarixiy markazi” obyektini tiklash bo‘yicha vazifalar ijrosi muddatini yana bir yilga uzaytirdi.

Turizm va sport vazirligi axborot xizmatining xabar berishicha, bu haqda Xitoyning Fuchjou shahrida bo‘lib o‘tgan YuNESKO Jahon merosi qo‘mitasining kengaytirilgan 44-sessiyasida ma’lum qilingan.

Shahrisabzning tarixiy markazi 2016-yilda YuNESKO tomonidan Umumjahon merosi obyektlari ro‘yxatiga kiritilgandi. Qo‘mitaning 2016-yilning iyulida o‘tkazilgan 40-sessiyasida Shahrisabz tarixiy markazi Umumjahon merosining xavf ostidagi obyektlar ro‘yxatiga kiritildi. Bunga qurilish ishlarida YuNESKOning butunjahon madaniy va tabiiy merosni muhofaza qilish to‘g‘risidagi konvensiyasiga rioya etilmagani sabab bo‘lgan.Shundan buyon Shahrisabz xavf ostidagi obyekt ro‘yxatida qoldirildi.

2019-yilda O‘zbekiston tomoni ikki yil ichida shaharni regeneratsiya qilish bo‘yicha reja loyihasini ishlab chiqish majburiyatini oldi. 2021-yilda o‘tkazilgan sessiyada ushbu muddat yana bir yilda uzaytirildi.

Sessiya davomida shuningdek O‘zbekistonning Jahon merosi ro‘yxatiga kiritish uchun taklif qilingan obyektlari bo‘yicha yangilangan ro‘yxat tasdiqlangan. Dastlabki ro‘yxat Respublika bo‘ylab joylashgan 32 madaniy, tabiiy va madaniy-tabiiy (aralash) meros obyektini o‘z ichiga olgan, bu mintaqaning boshqa davlatlariga nisbatan eng yuqori ko‘rsatkichdir.

Ma’lumot uchun, Rossiyada bu ko‘rsatkich — 28, Ukrainada — 17, Tojikistonda — 17, Qozog‘istonda — 14, Turkmanistonda — 10 ta, Ozarbayjonda — 10 ta, Armanistonda — 4 ta va Qirg‘izistonda 2 tani tashkil qiladi.