Германияда нацистлар концлагерида қоровул бўлиб ишлаган 100 ёшли эркак суд қилинади

Германияда 20 минг одам ўлдирилган Заксенхаузен нацистлар концлагерининг собиқ қўриқчиси судга чақирилди. Суд жараёни октябрь ойида Нойруппин туман судида бошланади.

Тергов маълумотларига кўра, эркак 1942 йилнинг январидан 1945 йилнинг февралигача Заксенхаузенда хизмат қилган. Ҳозирда гумонланувчи 100 ёшда.

«Қотиллик бўйича даъво муддати чекланмаган, шунинг учун кексалар ҳам судда жавоб бериши керак», — дейди Берлиндаги «Терроризм топографияси» ҳужжатлари марказининг тадқиқотчиси Стефани Бор.

Ёшини ҳисобга олган ҳолда, судланувчи суд мажлисида икки ярим соатдан кўп бўлмаган вақт давомида иштирок этади, деди суд раиси Франк Штарк.

Суд мажлисида даъвогарлар ҳам қатнашади.

«Заксенхаузен нацистлар раҳбарияти учун Берлин дарвозаларидаги жой эди, улар ҳаёт ва ўлим устидан ҳукмронлик қиляпмиз, деган хаёлда бўлган. Даъвогарларнинг аксарияти айбланувчи билан тенгдош ва адолатдан умидвор»,— дейди даъвогарларнинг адвокати Томас Валтер.

Заксенхаузен Берлин шимолида, Ораниенбург шаҳри яқинида жойлашган. 1936 йилдан 1945- йилгача 200 мингдан ортиқ одам бу концлагердан ўтган. Заксенхаузендагилар 1945 йилнинг 22—23 апрелида Қизил армия томонидан озод қилинган.

Аввалроқ 96 ёшли аёл Иккинчи жаҳон уруши йилларида Польша концлагерида сақланган 11 300 маҳбуснинг ўлдирилишига алоқадорликда айбланиб, суд қилиниши ҳақида хабар берилганди. Аёл 18 ёшидан бошлаб 1943 йил июндан 1945 йил апрелгача Польшадаги Штуттгоф концлагери командирининг котибаси бўлиб ишлаган.

Аёлга қарши очилган жиноий ишда 11 387 та қотиллик қайд этилган бўлиб, жабрланганларнинг еттитаси тирик қолган. Суд жараёни 30 сентябрда бошланади.