Мутахассисларнинг айтишича, чекиш, қаҳва ичиш ва гигиенага амал қилмаслик оқибатида тишларниг ранги ўзгаради. Тиш ортида қолиб кетган овқат қолдиқлари эса аста-секин тошга айланади. Бу эса вақт ўтиб, оғиз бўшлиғи билан боғлиқ бир қанча муаммоларни келтириб чиқариши мумкин. Бу каби муаммоларни эса фақат стоматолог ёрдамида бартараф қилиш мумкин.
Мутахассис Саидолмхўжа Сайдалиев фойдали стоматологик муолажалардан бири — тиш тозалаш процедураси ҳақида батафсил маълумот берди.
Тиш тозалаш процедураси ҳақида
Тиш тозалаш процедураси бу тишда, эмалда йиғилиб қолган тошларни тозалаб, унинг гигиеник ҳолатини яхшилаш учун қилинади.Авваллари механик усулда, яъни қўлда тиш тозалаб чиқиларди.
Ҳозирги кунда эса тишни ювадиган махсус ускуналар бор. У худди машина ювадиган карчерга ўхшайди. Ускунага оқартирувчи кукун солинади ва босим билан тиш тозаланади. Энг ижобий тарафи тозалашдан сўнг тиш нафақат тоза бўлади ва балки оқаради ҳам.
Процедура неча ёшдан тавсия этилади?
Одатда тишнинг олд томони ювилади, холос. Аммо тишнинг орқа қисми тозаланмай қолиб кетади. У ерда эса тошлар, овқат қолдиқлари йиғилиб қолади. Агар тиш улардан тозаланмаса, милк чўкиб бораверади. Қолаверса, ўша жойда аста-секин кариес пайдо бўлади.Шунинг учун процедурадан фойдаланишнинг эрта-кечи йўқ. Агар бола 17—18 ёшида ҳам тиши тозалайдиган ҳолатда бўлса, бемалол қилавериши мумкин.
Баъзилар келиб «Бу ёши катталар учун эмас экан, тишларимни тозалатгандим, милкларим очилиб қолди», дейди.
Биласизми, буни сабаби нимада? Масалан, аёл 50 ёшда бўлса, унда йиллар давомида тошлар катталашиб, милкни чўктириб қўйган. Уларни олганингиздан кейин табиийки ораси очилиб қолади.
Албатта, шундан кейин мижоз бу процедурани ёмон деб ўйлайди. Аммо у хизматдан 15 йил олдин фойдаланганида эди, бундай ҳолатга тушмасди.
Шундай бўлса-да, хавотирга ўрин йўқ. Милк бир кунда бир миллиметр ўсади. «Чистка»дан сўнг, милклар бир ҳафта, узоғи 14 кун ичида ўз ҳолатини тиклаб олади.
Аёлнинг ҳолатига тушмаслик учун ҳар олти ойда ёки ҳеч бўлмаганда йилда бир марта, албатта, тишларни тозалатиб юриш керак.
Баъзи шифокорлар тозалашдан кейин тиш сезувчанлигини камайтириш учун фтор лак суради. Мен эса бундай қилмайман. Сабаби фтор ўзига ранг тортади.
Шунинг учун процедурадан сўнг бир ҳафта давомида кунига камида беш маҳал лоробен, тузли, ёки мойчечакли сувда оғизни чайиб туришни тавсия қиламан. Яна бир муҳим қоида: тиш тозаланганидан сўнг, мижоз неччи марта овқатланса, шунча маҳал тишни ювиши шарт.
Тиш тозалаш процедурасининг нархлари ҳақида
Аксарият стоматологлар тишнинг ҳолатига, яъни тош оз-кўплигига қараб процедуранинг нархини белгилайди. Тўғри, тоши кўпроқ бўлса узоқ вақт олиши мумкин, лекин қилиниш методи бир хил.Тиш донасини тозалаш 10 минг сўмдан бошланади. Тишнинг олди ва орқа қисми ҳам тозаланса, донаси 20 минг сўмдан бўлади.
Мавзуга доир:
- Тиш винери нима? Ўзбекистонлик мутахассис процедуранинг афзаликклари ва салбий жиҳатлари ҳақида батафсил маълумот берди
- Тишлар ўз вақтида даволанмаса, инсон организмида қандай ўзгаришлар юз беради?
- Олимлар тишни кариесдан ҳимоя қилишнинг янги усулини топди
- Тишлар саломатлигига путур етказадиган 10 та зарарли одат
- Замонавий турмуш тарзида энг кўп кузатиладиган 5 зарарли одат
Изоҳ (0)