Жиззах вилоятининг Шароф Рашидов туманида ўзбошимчалик билан бир туп қайрағоч дарахтини кесган фуқарога жарима ва келтирилган зарарни тўлаш белгиланди.
Жиззах вилояти Экология бошқармаси матбуот хизматининг маълум қилишича, фуқаро Й.Ж. туманнинг «Ғозғонтепа» МФЙдан кесиб ўтувчи Жиззах—Зарбдор йўли бўйидаги уч туп қайрағоч дарахтини кесишга рухсат сўраган. Аммо бошқарма томонидан чиқарилган тегишли хатга асосан ушбу дарахтларни кесишга рухсат берилмаган.
Шунга қарамасдан, фуқаро ўзбошимчалик билан бир туп қайрағоч дарахтини кесиб, кундаков қилаётгани Шароф Рашидов тумани давлат инспекторлари томонидан аниқланган.
Й.Ж.га нисбатан БҲМнинг 10 баробари (2 миллион 450 минг сўм) миқдорида жарима ва 51 миллион 450 минг сўм миқдорида табиатга етказилган зарар белгиланди.
Хабарда айтилишича, ҳозирги кунда қарзни ундириш учун ҳужжатлар судга юборилган.
Изоҳ (0)