Ўзбекистон Молия вазирлиги буйруғига асосан Сарварбек Аҳмедов Капитал бозорини ривожлантириш департаменти директори лавозимига тайинланди. Бу ҳақда вазирлик матбуот хизмати хабар берди.
Сарварбек Аҳмедов 1985 йил Хоразм вилоятида туғилган. 2005 йилда Жаҳон иқтисодиёти ва дипломатия университетини (бакалавр), 2008 йилда Манчестер университетини (Буюк Британия), 2019 йилда Миллий тадқиқот университетининг Иқтисодиёт олий мактабини (Россия) тамомлаган.
Меҳнат фаолиятини 2008 йилда Goldman Sachs International (Лондон) валюта операциялари департаменти ходими сифатида бошлаган.
2011—2014 йилларда Goldman Sachs International (Лондон) валюта ва бошқа молиявий деривативлар операциялари департаментида етакчи ходим, 2014—2016 йилларда молиявий деривативлар операциялари департаменти бўлим бошлиғи, висе-президент лавозимларида фаолият юритган. 2016—2019 йилларда Goldman Sachs Bank МЧЖда (Москва) молиявий инструментлар ва ғазначилик операциялари департаменти висе-президенти бўлган.
Сарварбек Аҳмедов 2019—2021 йилларда Ўзбекистон Молия вазирлиги Халқаро рейтинг ва индекслар билан ишлаш бошқармаси бошлиғи, Молия вазирлиги Ғазначилик бошлиғи ўринбосари ва биринчи ўринбосари лавозимларида фаолият юритган.
Эслатиб ўтамиз, Ўзбекистонда икки йил аввал ташкил қилинган Капитал бозорини ривожлантириш агентлиги 2021 йилнинг 3 апрелида тугатилиб, агентликнинг барча ваколатлари, функция, вазифалари ва мол-мулки Молия вазирлигига ўтказилганди.
2021 йилнинг 13 апрелида тугатилган агентлик ўрнига Капитал бозорини ривожлантириш департаменти ташкил этилди.
Изоҳ (0)