Дунё ва ўзбек спортига оид 27 июль кунининг муҳим хабарлари дайжести билан танишинг.
Ўзбекистон
Токиода бўлиб ўтаётган Олимпия ўйинларининг тўртинчи кунги баҳслари ортда қолди. Баҳсларда иштирок этган беш нафар ўзбекистонлик спортчидан тўрт нафари мусобақа билан хайрлашди. Фақатгина боксчи Бобоусмон Ботуров кейинги босқичга йўл олди. Ўзбекистонлик спортчиларнинг Токио—2020 4-кунидаги натижалари ҳақида батафсил бу ерда ўқиш мумкин.
Ўзбекистон футзал миллий терма жамоаси Таиландда Continental халқаро ўртоқлик мусобақасида иштирок этмоқда. Баҳодир Аҳмедов шогирдлари гуруҳ босқичидаги дастлабки икки ўйинда Косово (6:3) ва Мозамбикни (10:0) енгган бўлса, сўнгги турда майдон эгаларига 3:4 ҳисобида мағлуб бўлди. Терма жамоа гуруҳда иккинчи ўрин билан ярим финалга чиқди, мазкур босқичда ўзбекистонлик футзалчилар Эрон вакилларига қарши саф тортади. 1/2 финал учрашуви 29 июль санасига белгиланган.
«Пахтакор» жамоадан кетган Эрен Дердийокнинг ўрнига Сербиядан бошқа бир легионер топди. «Шерлар» Сербиянинг «Партизан» клуби ҳужумчиси Боян Матич билан келишувга эришган. Бу ҳақда серб клуби матбуот хизматига таяниб «Championat.asia» хабар бермоқда.
Матич 2020/21 йилги мавсумнинг биринчи даврасини «Партизан» сафида ўтказган, мавсумнинг иккинчи қисмида эса у Грециянинг «Атромитос»ида ижарада ўйнаган. Унинг ўтган мавсумдаги статистикаси қуйидагича: 25 та ўйин, 2 та голли узатма.
«Локомотив» 22 ёшли нигериялик ҳимоячи Самюэль Опе билан шартнома имзолади. Самюэль мавсумнинг биринчи ярмини «Оқ-тепа» таркибида ўтказганди. У «темир йўлчилар» сафида 22-рақам остида ҳаракат қилади.
Виктор Кумиков «Андижон»га қайтди. Россиялик иккинчи давра олдидан андижонликлар бош мураббийи сифатида таништирилди. Қайд этиш жоиз, Кумиков 2020 йилда «Андижон»ни бошқарганди. Жамоа унинг қўл остида 10 учрашув ўтказиб, 5 та дуранг ва 5 та мағлубият қайд этган.Жаҳон
«Манчестер Юнайтед» Рафаэл Варан трансферини эълон қилди. Ҳозирча трансфернинг бошқа тафсилотлари маълум қилинмаган. Аввалроқ «қизиллар» француз учун 50 миллион евро тўлаши айтилганди.
Ёзги трансферлар ойнасида эркин агент мақомида «Реал»дан «ПСЖ»га ўтган Серхио Рамос жароҳати туфайли Франция Суперкубоги баҳсини ўтказиб юборади.
Париж клуби расмий сайтига кўра, испаниялик ҳимоячи жамоа машғулотларида чап оёғини шикастлаб олган. Футболчининг тикланиш жараёнига бир ҳафта муддат талаб этилиши айтилмоқда.
Токио Олимпиадасида тарихий натижалар қайд этилмоқда. Хусусан, япониялик ака-сингил дзюдочилар Ҳифуми Абе ва Ута Абе бир соатлик фарқ билан иккита олтин медалларни қўлга киритди.
13 ёшли спортчи Момизи Нисия эса Токио—2020 Олимпиадасида скейтбординг бўйича олтин медални қўлга киритиб, энг ёш Олимпия чемпионлари орасида кучли учликка кирди. Энг қизиғи, кумуш медални қўлга киритган бразилиялик Райсса Лил ҳам 13 ёшда эди. Олимпия ўйинлари 8 августга қадар давом этади.
Изоҳ (0)