Бухоро шаҳридаги «Дилкушо» теннис марказида 2021 йилнинг 26—27 июль кунлари Президент мактабига кириш имтиҳони бўлиб ўтди, дея хабар бермоқда «Дарё» мухбири.
Таъкидланишича, Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлиги тасарруфидаги Президент мактабида ўқиш учун Бухородан 5767 нафар ўқувчи ҳужжат топширган. Шаффофликни таъминлаш мақсадида тест жараёнлари онлайн трансляция қилинган. Шунингдек, 45 дона видеокамера ўрнатилиб, жараёнлар тўлиқ назоратга олинган. 144 нафар профессор ўқитувчи гуруҳ назоратчилари сифатида қатнашган.
«Икки кун давом этган тест синовларида пандемия тартиб-қоидаларига қатъий амал қилинди. Президент мактабида ўқиш учун ҳужжат топширган 5767 нафар талабгордан 5621 нафари тест синовларида иштирок этди. Ҳар бирининг саломатлиги хавфсизлиги таъминланди. Икки босқичли тест жараёнларининг биринчи босқичида бир пайтнинг ўзида 1440 нафар ўқувчи иштирокини таъминлаш имконияти яратилди. Яна шуни айтиш муҳимки, тест жараёнларини адолатли ва шаффоф ўтказиш учун барча қулайликлар шайланди. Шунингдек, ҳар бир талабгорга тест синовларида иштирок этиши тушунтирилди. Шунга қарамай, 146 нафар талабгор тест синовларига келмади. 1 нафар ўқувчи эса белгиланган тартиб-қоидаларни бузгани учун жараёндан четлатилди», — дейди ДТМ Бухоро вилояти бўлими бош мутахассиси Иззат Раҳмонов.
Президент мактабига қабул учун тест синовларининг иккинчи босқичи 2021 йилнинг 20 августидан 25 августига қадар ўтказилиши режалаштирилган.
Эслатиб ўтамиз, аввалроқ Фарғонада мактаб имтиҳонлари қуёш тиғи остида ўтказилаётгани танқид остига олинганди. «Gazeta.uz»га бу ҳақда изоҳ берган бола ҳуқуқлари бўйича вакил Алия Юнусова имтиҳонларни ушбу кунларда ўтказиш бош вазир Абдулла Арипов бошчилигида апрель ойида ўтказилган йиғилиш баённомасида кўзда тутилганини қайд этган. Болалар омбудсмани имтиҳонларни қабул қилиб олувчи буюк британиялик мутахассисларнинг Ўзбекистонга келгани сабабли кириш имтиҳонлари бошқа кунга кўчирилмаганини ҳам қўшимча қилган. Унинг сўзларига кўра, узоқ ҳудудлардан келган болаларнинг ота-оналари ҳам кириш имтиҳонлари саналарининг ўзгаришига қарши бўлган.
Изоҳ (0)