АҚШ Ироқдаги ҳарбий миссиясини 2021 йил охиригача якунлашини эълон қилди

АҚШ Ироқдаги ҳарбий миссиясини 2021 йил охиригача тугатади. Тегишли келишув ҳақида АҚШ президенти Жо Байден ва Ироқ бош вазири Мустафо ал-Козимий Вашингтондаги учрашув якунлари бўйича маълум қилди, деб ёзади Meduza.

Келаси йилдан бошлаб америкалик ҳарбий хизматчилар фақат Ироқ ҳарбийларини ўқитиш ва уларга консультация бериш билан шуғулланиб, жанговар ҳаракатларда иштирок этмайди.

Жо Байден Вашингтон Ироқда демократиянинг мустаҳкамланишини қўллаб-қувватлашини айтиб, мамлакатда парламент сайловлари октябрда бўлиб ўтишини хоҳлашини билдирди (сайловлар аввалроқ ўтказилиши керак эди, аммо январда улар кечиктирилди). Президент АҚШнинг хавфсизлик ва террорчиликка қарши кураш соҳасидаги ҳамкорлик тарафдори эканини таъкидлади.

Ироқ ИШИДга қарши курашда ортиқ америкалик ҳарбийларга эҳтиёж сезмайди, деди Козимий Байден билан учрашувдан аввал Associated Press’га берган интервьюсида. Унинг сўзларига кўра, Ироқ хавфсизлик кучлари ва армияси мамлакатни коалиция қўшинларисиз ҳам ҳимоя қилишга қодир.

Reuters қайд этишича, ҳарбий миссиянинг якунланиши ҳақидаги қарор кўп жиҳатдан расмий хусусиятга эга — аслида америкалик ҳарбийлар анчадан буён ироқликларни ўқитиш билан шуғулланади ва жанговар операцияларда камдан-кам қатнашади.

Айни пайтда Ироқда 2500 нафар америкалик ҳарбий хизматчилар бор.

АҚШ Ироққа 2003 йилда бостириб кирган, мамлакатда ҳукмронлик қилган диктатор Саддам Ҳусайннинг террорчилар билан эҳтимолий алоқаси бунинг учун расмий сабаб бўлиб хизмат қилган. Ҳусайн режими ағдарилганидан кейин Америка қўшинлари «Ал-Қоида» ва ИШИДга қарши маҳаллий операциялар ўтказиш билан шуғулланган.

Шу йилнинг 11 сентябрига қадар эса АҚШ Афғонистондан барча қўшинларини олиб чиқади. Бу мамлакатда америкаликлар 2001 йилдан буён бўлиб турибди.

Айни пайтда Афғонистондан АҚШ қўшинларининг олиб чиқилиши фонида мамлакатда ҳукумат ва «Толибон» ўртасидаги зиддият кучайган.

Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.

Германия, Италия ва Австралия эса Афғонистондан ўз қўшинларини олиб чиқишни якунлади.