Ўтган ҳафта Хитойнинг Хенан провинциясида кучли ёғингарчилик оқибатида сув тошқинлари кузатилган эди. Оқибатда 60 га яқин фуқаро ҳалок бўлган, қарийб 1 миллион киши провинциядан эвакуация қилинган, 600 минг гектар қишлоқ хўжалиги ерлари сув остида қолган. Табиий офат етказган умумий зарар 2 миллиард доллардан ошади, деб хабар беради IXBT.
Ҳозирда Хитой провинцияси секин-аста нормал ҳаёт тарзига қайтмоқда, шу билан бирга, одамлар чўкиб кетган мулкларини топяпти — улар орасида 80 мингдан ортиқ транспорт воситаси ҳам бор. Шунингдек, электрон қурилмалар, жумладан, смартфонлар ҳам сув остида қолган.
Хитой ижтимоий тармоқларида тарқалган видеода унинг муаллифи Huawei Mate 30 Pro смартфони уч кун сув остида қолиб кетганини сўзлаган. Қайта топилган телефон нафақат ёнган, балки ўзининг барча функцияларини тўлиқ бажара бошлаган.
Huawei Mate 30 Pro модели чанг ва намликдан IP68 даражаси бўйича ҳимояланган, аммо бу смартфон сув остида бир неча кун қолишини кафолатламайди.
Huawei компанияси бепул сервис ва турли қурилмаларига 50 фоизли чегирма эълон қилиб, Хенан провинциясидаги сув тошқинлари оқибатларига қарши курашишда ёрдам кўратмоқда.
Аввалроқ Huawei Mate 40 ва iPhone 12’нинг сув ўтказмаслик қобилияти кир ювадиган машинада «текшириб кўрилгани» тўғрисида хабар берилганди.
Изоҳ (0)