OnePlus бренди ўртача нархдаги Nord 2 смартфони ва Buds Pro симсиз наушникларини тақдим этди, деб хабар беради «Afisha.uz».
OnePlus Buds Pro
Янги симсиз наушниклар ташқи кўриниши билан Apple’нинг AirPods’ларига ўхшаб кетади. Янги модель 15 дан 40 децибелгача бўлган диапазондаги фаол шовқин сўндириш тизимига эга бўлган. Бунинг учун наушникнинг ҳар бирига учтадан микрофон ўрнатилган.
Ишлаб чиқарувчининг маълум қилишича, шовқин сўндириш функцияси билан бирга наушниклар кейси ёрдамида 28 соатгача ишлай олади. Мазкур функциясиз эса унинг автономлиги 38 соатга етади. Кейссиз эса наушниклар шовқин сўндириш тизимида беш соат, усиз етти соати ишлашга қодир.
Buds Pro кейси Warp Charge тезкор қувватланиш функциясига эга бўлиб, у 10 дақиқали қувватлантириш орқали 10 соат автономликни таъминлайди. Шунингдек, наушниклар учун футлярни симсиз усулда ҳам қувватлантирса бўлади.
Наушниклар чанг ва намликдан IP55 стандарти бўйича ҳимояланган ва қора ҳамда оқ рангларда сотувга чиқади. Савдолар 25 августдан 150 доллар қийматида бошланади.
OnePlus Nord 2
Смартфон «Сиз орзу қила олган барча нарса» шиори остида тақдим этилган. Янги модель Full HD+ сифатни қўллаб-қувватловчи 6,43 дюймли AMOLED-дисплейга эга бўлган, янгиланиш частотаси 90 герц ва Gorilla Glass 5 шишаси билан ҳимояланган. Бармоқ изи сканери экран остида жойлашган.
Смартфон ичидан MediaTek Dimensity 1200-АI процессори, 8/12 гигабайт тезкор ва 128/256 гигабайт ички хотира ўрин олган. Аккумулятор сиғими 4500 мА/соат бўлиб, 65 ваттли Warp Charge тезкор қувватланиш функциясига эга.
OnePlus Nord 2 ўзидан олдинги моделлардан стереодинамиклар ва Haptic 2.0 тактил узатиш тизимига эга бўлган. Қурилманинг асосий камераси 50 мегапиксел, оптик барқарорлаштиргичи OnePlus 9 Pro’дан мерос қолган. Шунингдек, 8 мегапикселли кенг бурчак, 2 мегапикселли макро-модуль ва 32 мегапикселли фронтал камера мавжуд.
Европада олдиндан буюртмалар 28 июлдан бошланади. Расмий нархлар:
- 8/128 гб — 470 доллар;
- 12/256 гб — 585 доллар.
Изоҳ (0)