Жанубий Корея президенти Мун Чже Ин ва КХДР етакчиси Ким Чен Ин Сеул ва Пхенян ўртасида тўғридан-тўғри алоқа линиясини қайта тиклашга келишиб олди. Бу ҳақда Жанубий Корея президенти маъмуриятининг Twitter’даги баёнотга таяниб, «РБК» хабар берди.
Фото: Getty Images
«Жануб ва Шимол икки Корея ўртасидаги алоқа линиясини тиклашга қарор қилди», — дейилади хабарда. Хабарга кўра, икки мамлакат трансчегаравий алоқа линиясини 27 июль куни эрталаб соат 10:00 да (Тошкент вақти билан соат 06:00 да) қайта тиклаган.
Сеул, шунингдек, икки Корея раҳбарлари апрель ойидан бери бир неча бор шахсий мактублар алмашганини таъкидлади. Шимолий Корея Марказий телеграф агентлиги ҳам икки мамлакат ўртасидаги алоқалар тиклангани тўғрисида хабар берган.
«Ҳозир бутун корейс халқи Шимол ва Жануб алоқалари муваффақиятсизлик ва турғунликдан сўнг тезроқ қайта тикланишини истайди. Шу муносабат билан Шимол ва Жануб раҳбарлари яқинда бир нечта шахсий мактублар алмашиб, кореялараро алоқа линияларини қайта йўлга қўйиш орқали ўзаро ишончни тиклаш ва ярашувни рағбатлантириш борасида катта қадам ташлашга келишиб олди», — дейилади агентлик хабарида.
«Алоқа линияларининг тикланиши кореялараро муносабатларни яхшилаш ва ривожлантиришда ижобий рол ўйнайди», — дея таъкидлаган КХДР.
Мамлакатлар тез орада ўзаро ишончни қайта тиклаш ва дипломатик муносабатларни йўлга қўйиш тўғрисида келишиб олган.
2020 йил 16 июнь куни КХДР Жанубий Корея билан барча алоқа линиялари узилганини эълон қилганди. Тегишли қарорни Шимолий Корея раҳбарининг синглиси, Корея Меҳнат партияси марказий қўмитаси бўлим бошлиғининг биринчи ўринбосари Ким Ё Чжон қабул қилган. КХДР Жанубий Корея расмийлари Шимол ва Жануб ўртасидаги муносабатларни «сўнгги нуқтага» олиб келганини ва мамлакатлар ўртасидаги музокаралар «фақат умидсизлик» келтириб чиқаришини таъкидлаган.
Бунгача Шимолий Корея ҳарбийлари Кесон чегара шаҳридаги Жанубий Корея билан музокараларда фойдаланилган алоқа марказини портлатган.
Ўзаро муносабатларнинг узилишига Жанубий Корея нодавлат нотижорат ташкилоти фаолларининг Шимолий Корея режими ва унинг раҳбарига қарши танқидий ташвиқот варақаларини шарлар ёрдамида чегара орқали ўзбошимчалик билан юборгани сабаб бўлган.
Аввалроқ Жанубий Корея Шимолий Кореяни икки давлат ўртасидаги алоқа каналларини тиклашга чақирганди.
Шунингдек, КХДР раҳбарининг синглиси Жанубий Корея президентини «Америка тўтиси» деб атагани, Ким Чен Ин Жанубий Корея мусиқа ва фильмларига қарши уруш эълон қилгани ҳақида хабарлар берилганди.
