Самарқанд шаҳрида кучли таъсир қилувчи дори воситаларини муомалага киритилишининг олди олинди, дея хабар қилмоқда Бош прокуратура ҳузуридаги Департамент матбуот хизмати.
Қайд этилишича, Департамент ҳамда ДХХнинг Самарқанд шаҳар бўлимлари томонидан ўтказилган тезкор тадбирда фуқаро Э.А. ва бошқалар олдиндан тил бириктириб, фуқаро Ш.га жами 1622 дона кучли таъсир қилувчи «Регапен» номли дори воситасини 3000 АҚШ долларига сотган вақтида ашёвий далиллар билан ушланган.
Мазкур ҳолат юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Тошкентда 175 миллион сўмлик дори воситасини ноқонуний муомалага киритишга уринган шахс қўлга олингани, Оҳангаронда Epica ҳайдовчиси 265,7 миллион сўмлик кучли таъсир этувчи дори воситаларини ноқонуний олиб кетаётгани аниқлангани ҳамда Фарғонада қиймати салкам 10 миллион сўм бўлган кучли таъсир қилувчи дори воситаларининг ноқонуний айланмасига чек қўйилгани ҳақида хабар берилганди.
Изоҳ (0)