Қашқадарё вилоятининг Шаҳрисабз туманидаги 15-сонли мактабда муассасага берилган салкам 40 тонна кўмирнинг 5 тоннаси талон-торож қилингани айтилди. Бу ҳақда хабар берган «Дарё» мухбирининг ёзишича, мазкур ҳолат 2021 йилнинг 23 июль куни Жиноят ишлари бўйича Шаҳрисабз туман судида кўриб чиқилган.
Фото: «Дарё»
Суд раиси Орзимурод Шукуров раислигида ўтган суд мажлисида биринчи бўлиб сўз олган 15-мактаб директорининг хўжалик ишлари бўйича ўринбосари Ў.А. айбини тан олиб, кўмир талон-торожидан мактаб директорининг бехабарлигини, бу иши учун ҳатто унга танбеҳ берганини маълум қилган.
Гувоҳ сифатида тингланган шу мактаб ўқитувчиси Нафиса Тиловова эса 2021 йилнинг 4 июнь куни мактаб ўқитувчиси Р.С. кўмирни халтага солиб, кечги 17:00 да юк машинасига ортиб олиб кетганини кўрганини маълум қилган.
Яна бир гувоҳ — шу мактабда психолог бўлиб ишловчи Ихтиёр Давронов эса 2021 йилнинг 4 июнь куни Р.С.га сўрагани учун 19 дона 50 килограммлик елим қоп берганини маълум қилди. Гувоҳ шунингдек, мактаб «завхози» мактаб директори Меҳмонали Ҳайдаровнинг рухсатисиз кўмирни сота олмаслигини, судда директор ишига ҳам ҳуқуқий баҳо берилишини сўради.
Шаҳрисабз туман ИИБ профилактика инспектори Дониёр Тошпўлатов ҳам ўрганиш олиб борган пайтда Рўзимурод Сафаров 30 дона 50 килограммлик елим қопда майда кўмирни олиб кетганини аниқланганини айтди. «Участкавой»нинг айтишича, далолатномада сотилган кўмир 1 тонна деб ёзилган.
Айбланувчи ва гувоҳларнинг сўзлари, тергов ҳужжатларидаги камчиликларни инобатга олган суд жиноий ишни қайта тергов қилиш лозим деган қарорга келган.
«Дарё»га бу ҳақда маълум қилган мактаб ўқитувчиларининг айтишича, мактабга қиш мавсуми учун берилган салкам 40 тонна кўмирнинг 5 тоннаси мавсумдан қолдирилиб, сақлаб турилган ва июнь ойида шу мактаб ўқитувчисига сотилган.
«Мазкур иш бўйича суддан адолатли ҳукм кутяпмиз. Суд ишни терговга қайтариб, қайта тергов қилиш керак деган хулосага келди. Ўйлаймизки, иш адолатли кўриб чиқилади», — дейди «Дарё» мухбири билан суҳбатлашган ўқитувчи.
