Qashqadaryo viloyatining Shahrisabz tumanidagi 15-sonli maktabda muassasaga berilgan salkam 40 tonna ko‘mirning 5 tonnasi talon-toroj qilingani aytildi. Bu haqda xabar bergan “Daryo” muxbirining yozishicha, mazkur holat 2021-yilning 23-iyul kuni Jinoyat ishlari bo‘yicha Shahrisabz tuman sudida ko‘rib chiqilgan.
Sud raisi Orzimurod Shukurov raisligida o‘tgan sud majlisida birinchi bo‘lib so‘z olgan 15-maktab direktorining xo‘jalik ishlari bo‘yicha o‘rinbosari O‘.A. aybini tan olib, ko‘mir talon-torojidan maktab direktorining bexabarligini, bu ishi uchun hatto unga tanbeh berganini ma’lum qilgan.
Guvoh sifatida tinglangan shu maktab o‘qituvchisi Nafisa Tilovova esa 2021-yilning 4-iyun kuni maktab o‘qituvchisi R.S. ko‘mirni xaltaga solib, kechgi 17:00 da yuk mashinasiga ortib olib ketganini ko‘rganini ma’lum qilgan.
Yana bir guvoh — shu maktabda psixolog bo‘lib ishlovchi Ixtiyor Davronov esa 2021-yilning 4-iyun kuni R.S.ga so‘ragani uchun 19 dona 50 kilogrammlik yelim qop berganini ma’lum qildi. Guvoh shuningdek, maktab “zavxozi” maktab direktori Mehmonali Haydarovning ruxsatisiz ko‘mirni sota olmasligini, sudda direktor ishiga ham huquqiy baho berilishini so‘radi.
Shahrisabz tuman IIB profilaktika inspektori Doniyor Toshpo‘latov ham o‘rganish olib borgan paytda Ro‘zimurod Safarov 30 dona 50 kilogrammlik yelim qopda mayda ko‘mirni olib ketganini aniqlanganini aytdi. “Uchastkavoy”ning aytishicha, dalolatnomada sotilgan ko‘mir 1 tonna deb yozilgan.
Ayblanuvchi va guvohlarning so‘zlari, tergov hujjatlaridagi kamchiliklarni inobatga olgan sud jinoiy ishni qayta tergov qilish lozim degan qarorga kelgan.
“Daryo”ga bu haqda ma’lum qilgan maktab o‘qituvchilarining aytishicha, maktabga qish mavsumi uchun berilgan salkam 40 tonna ko‘mirning 5 tonnasi mavsumdan qoldirilib, saqlab turilgan va iyun oyida shu maktab o‘qituvchisiga sotilgan.
“Mazkur ish bo‘yicha suddan adolatli hukm kutyapmiz. Sud ishni tergovga qaytarib, qayta tergov qilish kerak degan xulosaga keldi. O‘ylaymizki, ish adolatli ko‘rib chiqiladi”, — deydi “Daryo” muxbiri bilan suhbatlashgan o‘qituvchi.
Izoh (0)