26 июль куни республика бўйлаб президент мактабларига имтиҳонлар бошланди. Карантин сабаб имтиҳонлар очиқ майдонда ўтказилмоқда. Блогер Исроил Тиллабоевнинг ёзишича, Фарғона ва Марғилон шаҳарларидаги имтиҳонлар стадионларда ўтказилган.
Блогернинг ёзишича, имтиҳон учун ўқувчилар соат 07:30 да стадионга етиб келган, имтиҳоннинг ўзи эса 8:10 да бошланган ва 09:30 гача давом этган.
«Икки соат сизни шу иссиққа ўтиргизиб қўйишса, нима бўлади, расмдаги кишининг кўйлагини сув бўлиб кетганини кўрдингизми?
У киши салқинда жон сақлаб туриб шунчалик! Ёки қуйидаги расмда шароит йўқлигидан (йўқ бўладиям-да, болаларга йўқ-ку, ота-оналар билан нима ишимиз бор, денг) битта дарахт соясида талашиб жипс турган кишиларни кўряпсизми, катталар чидолмаяпмиз-ку», — деб ёзади блогер.
Унинг сўзларига кўра, соат 09:00 ларда олинган суратда ҳарорат 35 даража иссиқни кўрсатган ва баъзи болалар жазирама сабаб ўзини ташлаб юборган, уларга тиббий ёрдам кўрсатилган.
«Битта мактабга кириш учун 24 нафар бола олувчи ўринга минглаб болалар шунчалик иссиқда қийналяпти, тўғри, бу энг яхши мактаб, орзуси барчанинг, лекин барибир булар 10-11 ёшли болалар-ку», — дея қайд этади Тиллабоев.
У имтиҳонни шаҳардаги Ал-Фарғоний боғида ўтказиш бўйича таклифни ўртага ташлаган:
Фарғона вилояти ҳокимлиги, Президент таълим муассасалари агентлиги биргалашиб мана шу салқин боғни тайёрласа бўлар эди-ку. Атрофига икки қатор лента, 10-15 та кўп ички ишлар ходими кетади, холос, ҳар ҳолда бутун вилоят болалари иссиқда куйиб, пишиб тест ечмасди, бир кунлик имтиҳонни деб бирор касал бўлиб қолишдан сақланарди.Ана Тошкентда Ботаника боғи салқинларида ташкиллаштирасизлар-ку. Нега пойтахт болаларини салқинга, вилоят болаларини иссиққа қўйишларига индамадиларинг? Ёки вилоят болалари иссиқда кўп юриб ўрганган, дедими биров?
Ўртоқлар! Шу болалар ҳаммамизнинг болаларимиз, нав-ниҳоллар. Қани тиббиёт олимларимиз, гапиринглар, шу иссиқнинг бола соғлиғига зиёни йўқми? Йўқ, зиён қилмайди, денглар, биз рози.
Ҳали 3 кун эрталаб 08:00 да ва кеч соат 19:00 да ҳам имтиҳонлар бўлади. 19:00 даги имтиҳонга 17:30 дан бошлаб келади болалар, унда ҳам 40 даражада иссиқдан кам бўлмайди, болалар имтиҳонга киргунча ўзи тамом бўлади...
Айтганча, битта нарсага лолман, болаларни имтиҳонга киритиб юборишда ота-она-ю болалар орасида ярим сантиметр жой йўқ, тиқилинч, имтиҳонга киргач икки метр ижтимоий масофа сақлаб қўйилгани маъноси нима экан?
Бундай ташкиллаштиришларини кутмагандим. Агентлик ва вилоят ҳокимликларидан болалар соғлиғи керак бўлса, зудлик билан ушбу имтиҳонларни салқин жойга, боғларга кўчиришларини ота-оналар ва ўқитувчилар номидан талаб қиламиз!
Аввалроқ Ўзбекистонда президент мактаби битирувчилари давлат ОТМларига имтиҳонсиз грант асосида қабул қилиниши тўғрисида хабар берилганди.
Изоҳ (0)