Қашқадарё вилоятининг Китоб туманидаги юқумли касалликлар шифохонасида коронавирусга чалинган беморлар даволанаётгани, шифохонага кириб-чиқишда назорат йўқлиги, шунингдек, беморлар билан ишлаётган шифохона ходимларига коронавирусдан ҳимояланиш учун махсус форма берилмаётгани маълум қилинди.
Бу ҳақда «Дарё»га билдирган шифохона ходимларининг айтишича, ходимлар 400 минг сўмдан 800 минг сўмгача маош олади. Ва айнан шу маош эвазига улар шифохонада коронавирусдан даволанаётган беморларга қарашга мажбур.
«Энг ёмони ходимларга махсус кийим бош ҳам берилмайди. Ҳаммамиз доимгидек иш формада оғир касаллар билан ишлаб келяпмиз. Раҳбарият бунга умуман эътибор қаратмаяпти. Шифохонамизда эга йўқ», — дейди шу масканда ишловчи ишчилардан бири.
Мурожаатчиларнинг қўшимча қилишича, фуқароларнинг шифохонага кириб-чиқиши ҳам назорат қилинмайди.
«Хоҳлаган одам келиб, хоҳлаган беморининг олдига кириб-чиқиб кетяпти. Назорат йўқ», — дейди шифохона ходими.
Мазкур видеодаги ҳолатни изоҳлаган Китоб туман тиббиёт бирлашмаси бош шифокори Шавкат Ғаффоровнинг айтишича, туманда коронавирус беморлари билан ишлаш учун шифохона ходимларига етарли даражада махсус форма бор.
«Айни кунда шифохонамизда мусбат натижа билан ётган бемор йўқ. Шифохонада даволанаётган беморларнинг барчаси коронавирусдан кейинги асоратланган ва мусбат натижа бермаган, пневмония билан оғриган беморлар бўлиб, уларга кислород баллонлари уланган. Кислород станциямиз ўша ерда бўлгани учун кислородга муҳтож беморларни шу ерда ётқизишга мажбурмиз», — дейди туман тиббиёт бирлашмаси бош шифокори Шавкат Ғаффоров.
Бош шифокорнинг маълумот беришича, шифохонада пневмония билан оғриган ва кислород баллонга эҳтиёж сезган беморлар ўттиз нафардан ортиқни ташкил қилади.
«Бу беморлардан коронавирус юқмайди. Шунинг учун шифохонамиз ходимлари ваҳима қилмаса ҳам бўлади. Бу ҳақда уларга айтилган ва тушунтирилган», — дейди бош шифокор.
Шавкат Ғаффоровнинг маълумот беришича, айни кунга қадар туманда коронавирусга тест жараёнларида мусбат натижа қайд этган беморлар даволаниш учун Қарши шаҳрига юборилган.
«Эндиликда бугундан, 2021 йилнинг 26 июлидан бошлаб туман юқумли касалликлар шифохонаси негизида 100 ўринли коронавирус беморларини даволаш учун махсус шифохона ташкил этилиб, Яккабоғ, Шаҳрисабз шаҳар ва туман, шунингдек, Китоб туманидаги беморлар учун хизмат кўрсатади», — дейди масъул шифокор.
Бош шифокорнинг қўшимча маълумот беришича, махсус шифохона ташкил этилгач, тиббиёт ходимлари учун махсус кийим бош ва коронавирус беморлари билан ишлагани учун рағбат пуллари ҳам берилади. Қолаверса, шифохонага кириб-чиқиш ҳам Миллий гвардия ходимлари томонидан назорат қилинади.
Изоҳ (0)