Сўхда июлда уч марта сел кузатилди, 20 та хонадон зарар кўрди. Жабрланган оилаларга ёрдам пуллари тарқатилди

Фарғона вилоятининг Сўх туманида селдан жабр кўрган оилаларга моддий ёрдам кўрсатилди, деб хабар беради туман ҳокимлиги матбуот хизмати.

15—16 июль кунлари Қирғизистоннинг Ўзбекистон билан чегарадош ҳудудларида кутилаётган маҳаллий ёмғирлар ҳисобига Андижон, Наманган ва Фарғона вилоятларининг тоғ олди ва тоғли ҳудудларида сел кузатилганди.

Ҳокимликнинг маълум қилишича, ой давомида туманда уч марта юзага келган табиий офат — сув тошқини оқибатида «Ҳушёр» маҳалласининг сел йўли йўналишида жойлашган баъзи фуқароларнинг экин ер майдонларига, ҳовлиларидаги қўшимча биноларга зарар етган.

Вилоят ҳокими Хайрулла Бозоров ташаббуси билан селдан зарар кўрган жами 136 нафар фуқаро истиқомат қиладиган 20 та хонадонга моддий ёрдам кўрсатилган.

Туман ҳокими Сайидбаҳром Сайидмусаев, «Маҳалла» хайрия жамоат фонди Фарғона вилояти бўлими бошқаруви раиси, вилоят молия бош бошқармаси бошлиғи ўринбосари ва бошқа мутасадди идоралар вакиллари иштирокида зарар кўрган оилаларга бир марталик моддий ёрдам — пул маблағлари етказиб берилган.

Эслатиб ўтамиз, олдинроқ Наманган шаҳридаги Азимжон Аҳмаджонов Косонсойга ёпирилган сел оқибатида икки ўғлини йўқотгани, улардан бири — 6 ёшли Абубакр Рустамов топилгани ва 14 июль куни дафн этилгани, иккинчиси — 2014 йилда туғилган Муҳаммадюсуф Рустамов эса қидирилаётгани ҳақида хабар берилганди.