Ўзбекистонлик икки теннисчи келишилган ўйинлар сабаб дисквалификация қилинди. Улардан бири бутун умрга теннисдан четлатилди

Ўзбекистонлик теннисчилар Темур Исмоилов ва Амал Султонбеков келишилган ўйинларда иштирок этгани сабаб жазоланди.

Бу ҳақида Теннисда ҳалолликни таъминлаш халқаро агентлиги (ITIA) хабар берди. Ушбу қарор халқаро агентлик 2019 йилдаги келишилган ўйинлар бўйича текширув ўтказганидан сўнг қабул қилинган.

Дастлабки текширувлардан сўнг Темур Исмоилов 7 йиллик дисквалификацияга учрагани маълум қилинганди. Навбатдаги текширувлардан кейин уни бутун умрга теннисдан четлатиш борасида қарорга келинган. Халқаро агентлик қўйган тақиқ 2021 йил 21 июлдан кучга кирган. Шунингдек, Темур Исмоилов 14 минг доллар миқдорида жарима ҳам тўлаши лозим. Амал Султонбеков эса 5 йилга теннис баҳсларидан четлатилган ва 8 минг доллар миқдоридаги жаримага тортилган.

Қайд этиш жоиз, Профессионал теннисчилар ассоциацияси (АТP) рейтингида Исмоилов 397-ўринни, Султонбеков эса 1886-ўринни банд этиб турганди.

«Gazeta.uz»нинг ёзишича, мазкур иш Коррупцияга қарши курашиш бўйича эшитиш офицери Жени Сублиер томонидан олиб борилган. Санкциялар спортчиларга бошқарув органлари томонидан рўйхатга олинган ёки ўтказиладиган ҳар қандай теннис мусобақаларида ўйнаш ёки қатнашиш тақиқланишини англатади. Иккала теннисчи ҳам Тенниснинг Коррупцияга қарши дастури (TACP) қоидаларининг учта бандини бузганликда айбдор деб топилган.

Маълумотга кўра, қоидабузарликлар орасида бирор кишини ўйин натижасига таъсир ўтказишга ундаш, ўйин натижасига таъсир ўтказишга рози бўлиш, ўйин натижасига таъсир ўтказиш учун пул ёки бошқа фойда олиш каби ҳолатлар бор. Бундан ташқари, Исмоилов ўйинчини бирор бир тадбирда ўзининг бор кучини намойиш қилмасликка ундаганликда ҳам айбдор деб топилган.

Эслатиб ўтамиз, аввалроқ ЎФА ҳаками Олим Тўйчибоев бир қатор футбол ўйинларида учрашувга ёки унинг натижасига таъсир ўтказиш мақсадида келишувларда қатнашгани учун бир йил муддатга футбол билан боғлиқ ҳар қандай фаолиятдан четлатилгани, самбо бўйича оғир вазн тоифасида ҳаракат қилувчи ўзбекистонлик Дилшод Чориев антидопинг қоидаларини бузганлиги сабаб 4 йил спорт мусобақаларига қатнаша олмаслиги, оғир атлетика бўйича Ўзбекистон терма жамоасининг етти нафар вакили антидопинг қоидаларини бузгани сабаб 4 йил муддатга дисквалификация қилингани ҳақида хабар берилганди.