Собиқ хонанда Жаҳонгир Отажонов ИИВ тизимидаги ходимларни ҳақорат қилганликда айбланиб, унга нисбатан иш очилди, дея хабар бермоқда Тошкент шаҳар ИИББ.
Қайд этилишича, ижтимоий тармоқларда Жаҳонгир Отажонов Ички ишлар вазирлиги тизими ходимларини ҳақорат қилган видеомурожаатини жойлаштириб, ходимларнинг шаъни ва қадр-қимматини беодоблик билан қасддан таҳқирлаган.
Мавзуга доир: Тошкент шаҳар ИИББ Жаҳонгир Отажоновнинг ИИВ ходимлари ҳақидаги видеомурожаатига муносабат билдирди
Жаҳонгир Отажоновнинг хатти-ҳаракатларига қонуний баҳо бериш мақсадида ўтказилган терговга қадар текширув жараёнида у юқоридаги видеомурожаатида айтиб ўтган ҳақоратли гапларни жаҳл устида айтганини, Республика ҳукумати ва ички ишлар органлари ходимларига нисбатан ҳеч қандай шахсий адовати йўқлигини таъкидлаб, қилган ишидан пушаймонлигини билдирган.
Жаҳонгир Отажоновнинг қилмишида Маъмурий жавобгарлик тўғрисидаги кодекснинг 41-моддаси (ҳақорат қилиш)да кўрсатилган ҳуқуқбузарлик аломатлари мавжудлиги сабабли тўпланган ҳужжатлар 2021 йил 23 июлда жиноят ишлари бўйича Шайхонтоҳур тумани судига тақдим этилди.
Бундан аввал Жаҳонгир Отажонов «сиёсатдан чекингани» ва онаси учун концерт бермоқчи эканини маълум қилгани ҳамда Жаҳонгир Отажонов Шавкат Мирзиёевга мурожаат қилиб, Ўзбекистондаги энг қолоқ туман ҳокимлиги лавозимини сўрагани ҳақида хабар берилганди.
