Абдуҳошим Абдуллаев Ўзбекистон Президентининг Фарғона вилоятидаги Халқ қабулхонаси мудири этиб тайинланди, деб хабар беради вилоят ҳокимлиги матбуот хизмати.
Фарғона вилояти Халқ қабулхонасида вилоят ҳокимлиги вакиллари ҳамда шаҳар-туманлар халқ қабулхоналари раҳбарлари иштирокида ўтган тадбирда вилоят ҳокимининг биринчи ўринбосари Авазбек Ўринбоев томонидан ушбу тайинлов ўқиб эшиттирилган.
Абдуҳошим Абдуллаев 1950 йилда Фарғона туманида туғилган. Фарғона политехника институтини тамомлаган. 1972—1990 йилларда Фарғона ёғ-мой комбинатида, Фарғона «Азот» ишлаб чиқариш бирлашмасида турли лавозимларда меҳнат қилган. 1990—1991 йилларда Фарғона шаҳар партия қўмитаси тафтиш комиссияси раиси бўлган. 1991—1992 йилларда ЎзХДП Фарғона шаҳар кенгаши биринчи котиби бўлиб ишлаган.
Абдуллаев 2005—2006 йилларда Марғилон шаҳар ҳокими, 2006—2008 йилларда Фарғона вилояти ҳокими бўлган, 2017—2019 йилларда «Ўзкимёсаноат» АЖ бошқарув раиси бўлган.
Абдуҳошим Абдуллаев 2006 йилда «Меҳнат шуҳрати» ордени билан тақдирланган.
Эслатиб ўтамиз, Ўзбекистон Президентининг Фарғонадаги қабулхонасини собиқ раҳбари — Ғуломжон Бобораҳимов 2021 йил 16 январда вафот этганди.
Изоҳ (0)