Самарқанд вилояти Ургут туманида ўғирланган қарийб 20 миллион сўмни тотализаторга тикиб юборган шахсга жиноят иши қўзғатилди, деб хабар беради вилояти ИИБ ахборот хизмати.
Маълум қилинишича, туманнинг «Қоратепа» маҳалласида яшовчи 18 ёшли йигит таваккалчиликка асосланган ўйинга ўғирлаган қарийб 20 миллион сўмини тикиб юборган.
Аниқланишича, у Самарқанд шаҳрида кечаси қаровсиз қолдирилган Damas’дан 1700 АҚШ долларини ўғирлаб, тотализаторга тикиб ютқазганидан сўнг, 13 июль куни яна ўғриликка қўл урган. Бу сафар у қаровсиз қолдирилган Spark’дан 2,5 миллион сўмни ўғирлаган.
Унга нисбатан Жиноят кодексининг 169-моддаси (ўғрилик) 3-қисми «а» банди билан жиноий иш қўзғатилган.
Бундан аввал Бухорода пулларини букмекерлик идорасида ютқазган йигит бобосининг уйидан 4,5 минг доллар ўғирлаб, уйга ўт қўйиб юборгани, Қорақалпоғистонда пулларини букмекерлик конторасида ютқазган йигитга нисбатан жиноят иши қўзғатилгани ҳамда Фарғонада ўзганинг пластик картасидан пул ўғирлаб, уларни тотализаторга тикиб юборган мактаб ўқувчиси судлангани ҳақида хабар берилганди.
Изоҳ (0)