Шавкат Мирзиёевнинг Қашқадарёга 2020 йил 12—13 ноябрь кунлари бўлиб ўтган ташрифи чоғида давлат раҳбари томонидан фаолияти қониқарсиз деб баҳоланган Касби тумани ҳокими Тўхтамурод Мейлиев вилоят ҳокими Зоир Мирзаев бошчилигидаги сектор раҳбарлари ишонч билдиргач, фаолиятини давом эттираётгани маълум бўлди. Бу ҳақда Қарши шаҳридаги Журналистлар уйида Касби ҳокими Тўхтамурод Мейлиев билан бўлиб ўтган матбуот анжуманида маълум қилинди, дея хабар берди «Дарё» мухбири.
Матбуот анжуманида сўз олган «Дарё» мухбири ҳокимга юзланиб, Президент танқидидан сўнг қандай хулоса чиқаргани ва танқиддан кейин айнан қайси туман ҳокимларидан ўрнак олиб, фаолиятини давом эттиргани билан қизиқди.
«Вилоятда энг ёш ҳоким бўлганим боис барча туман ва шаҳар ҳокимларини ўзимга устоз деб биламан. Барча ҳокимлардан ўрганадиган жиҳатларим бор. Масалан, ёнимизда турган Косон ҳокимидан фуқароларни қабул қилиши ва тадбиркорлар билан ишлашини, Деҳқонобод ҳокимидан туни билан фуқаролар муаммосини ўрганиб, қабул ўтказишини, Чироқчи ҳокимидан инвестицион лойиҳалар билан ишлашини ёки Қамаши, Яккабоғ туманлари, тоғли ҳудудлардан ерни ўзлаштиришни ўрганиб бораман. Уларнинг барчаси менга устоз, энг катта устозим эса вилоятимиз ҳокими Зоир Тоирович!», — деди туман ҳокими саволга жавоб берар экан.
Касби ҳокими Тўхтамурод Мейлиевнинг маълумот беришича, президент Шавкат Мирзиёевнинг Қашқадарёга 2020 йил 12—13 ноябрь кунлари бўлиб ўтган ташрифи чоғида Қаршида шаҳрида бўлиб ўтган видеоселектор йиғилишида ҳоким бошчилигидаги сектор раҳбарлари фаолияти қониқарсиз баҳолангач, вилоят ҳокими Зоир Мирзаев раҳбарлигидаги сектор бошлиқлари «ўртага тушган».
«Муҳтарам президентимиз танқидидан сўнг менга яна имкон берилди. Президентимиз вилоят ҳокимига ‘таклиф беринглар’ дегач, вилоят ҳокими Зоир Тоирович бошчилигидаги вилоят прокурори, вилоят ИИБ ва солиқ бошлиғи менга ишонч билдирди. Шундан сўнг, муҳтарам президентимиз менга яна имконият берди. Вилоят ҳокими Зоир Тоирович эса менга йўл-йўриқ кўрсатиб, тумандаги имкониятларни санаб, нима қилиш кераклигигача айтиб берди. Шундан сўнг мен бошчилигимдаги сектор раҳбарлари шу йўналишда фаолият юритдик», — деди Тўхтамурод Мейлиев.
Эслатиб ўтамиз, давлат раҳбари бошчилигида 2020 йил 13 ноябрь куни Қарши шаҳрида бўлиб ўтган йиғилишда Президент сўровига жавоб берган Тўхтамурод Мейлиев «Ҳар ҳафтанинг пайшанба куни тадбиркорларни тинглаб, уларнинг муаммосини ҳал этяпман», дегач Президент Шавкат Мирзиёев ҳокимга туман раҳбарларига тадбиркорлар билан уч кун мулоқот қилишни буюрганини эслатиб, «Тадбиркорларни нега фақат бир кун эшитасан? Тадбиркорларни эшитиб, уларнинг муаммосини ҳал қилишдан бошқа яна қандай зарур ишларинг бор?», деганди. Ва Касби тумани раҳбарлари ишидан қониқмаётганини билдириб, уларни йиғилиш давомида ишдан олганини, агар масъуллар уларга кафил бўлиб Касбида ўзгаришлар қилинишига ишонса, Тўхтамурод Мейлиев бошчилигидаги раҳбарларни лавозимида қолдиришини айтганди.
Изоҳ (0)