Нью-Йоркда июнь ойида «Гарри Поттер» оламининг дунёдаги энг йирик дўкони (уч қаватли) очилди. Эндиликда у ерда ташриф буюрувчилар ўзини худди Хогвартс ўқувчисидек ҳис қилиши учун виртуал реаллик аттракциони иш бошлади, деб хабар беради Esquire.
Биринчи аттракцион — «Хогвартсда тартибсизлик» бўлиб, у ўйинчини 9 ¾ платформасига элтади ва у ерда Добби билан таништиради. Эльф меҳмонни Хогвартс бўйлаб сайр қилдиради, йўлда ва сеҳрли мактабнинг деворларида эса уларни қизиқарли саргузашт ҳамда жумбоқлар кутиб туради. Уларни ечиш учун турли «сеҳр»лардан фойдаланишга тўғри келади.
The Hollywood Reporter’нинг ёзишича, ўйинчи оёқлари остидаги шовқинни ҳақиқатда сезади ва ҳатто эркин қулаш ҳолатида бўлади. Аттракцион ташриф буюрувчининг ҳаракатларидан келиб чиқиб, бир нечта муқобил финалга эга.
«Учар сеҳргарлар»да меҳмонлар оғиш орқали бошқариладиган қулай супургиларга эга бўлади. Ўйинчилар Хогвартс узра парвоз қилиши ёки квиддич майдонини кўздан кечириши, шунингдек, заҳарли тол ёнидан учиб ўтиши мумкин. Шундан сўнг ўйинчи Хабрид билан муҳим посилкани Хогвартсга етказиш мақсадида Лондон узра парвоз қилади ва «Ажал кушандалари» таъқибидан қочади.
https://www.instagram.com/p/CREyRtjj2IB/
Ҳар бир VR-ўйиннинг давомийлиги 30 дақиқа бўлиб, майдончада бир вақтнинг ўзида олти киши ўйнай олади. Меҳмонлар виртуал реалликка мўлжалланган кўзойнакдан ташқари қўл ва оёқ трекерлари, шунингдек, кичик электрон рюкзак билан жиҳозланади. Дўкондаги исталган ўйин чиптаси нархи 34 долларни ташкил этади.
Аввалроқ MyHeritage сайти фотопортретларни худди «Гарри Поттер»даги каби «жонлантириш»ни ўрганиб олгани, HBO Max «Гарри Поттер» фильмлари асосида сериал суратга олиши тўғрисида хабар берилганди.
Изоҳ (0)