Саудия Арабистонида Ҳаж зиёрати бошланди. Маккага бу йил 60 минг зиёратчи ташриф буюриши мумкин, аммо улар фақат қироллик фуқаролари ва у ерда яшовчи шахслардан иборат бўлади, чет элликлар эса пандемия туфайли иккинчи йил ҳам Ҳаж зиёратига қўйилмайди. Зиёратчиларнинг барчаси 18—65 ёшда ва коронавирусга қарши эмланган бўлиши шарт.
Зиёратчилар сони пандемиядан аввалги даврга қараганда анча кам бўлиб, илгарилари Саудия Арабистонига Ҳаж учун дунёнинг турли мамлакатларидан қарийб 2,5 миллион киши ташриф буюрарди. Пандемиянинг иккинчи йили Ҳаж зиёрати қандай кечаётгани ҳақида «РБК» фотогалерея тайёрлади.
Бу йил Ҳаж зиёрати 17—22 июль кунлари амалга оширилади.
Аввалроқ Саудия Арабистони Ҳаж ва Умра зиёратларини амалга ошириш учун рухсат бермоқчи экани, аммо улар коронавирус пандемиясига қарши кураш учун махсус шартларга амал қилган ҳолда ўтказилиши хабар қилинган эди.
Шунингдек, Саудия Арабистонида 30 майдан бошлаб қироллик ҳудудига киришга қўйилган тақиқ 11 та хориж мамлакати фуқаролари учун олиб ташланди.
Саудия Арабистони 2020 йил октябрь ойидан бошлаб мамлакатда яшовчи аҳолиси учун Умра зиёратини амалга оширишга рухсат берган эди. Ва ўша ой ўрталарида мамлакат ҳукумати етти ой ичида биринчи марта Маккадаги Ал-Ҳаром масжидида намоз ўқилишига рухсат берди.
2020 йил ноябридан Саудия Арабистони аста-секинлик билан 50 ёшдан катта бўлмаган зиёратчиларни манфий натижали ПЗР-тест билан Умра зиёрати учун киритишни бошлади.
Аввалроқ Саудия Арабистони коронавирусга қарши эмланган зиёратчиларга Ҳаж учун рухсат беришини маълум қилган эди.
Изоҳ (0)