Дунёда коронавирус пандемиясининг учинчи тўлқини бошланди. Бу ҳақда Жаҳон соғлиқни сақлаш ташкилоти (ЖССТ) раҳбари Тедрос Аданам Гебрейесус маълум қилди.
ЖССТ раҳбарининг сўзларига кўра, дунёда COVID-19 билан касалланишнинг сўнгги ўсишидан сўнг Европа ва Шимолий Американинг ўз фуқароларини эмлаш бўйича ҳаракатлари натижа бера бошлаганди, касалланиш ва ўлим ҳолатлари маълум муддат пасайган.
«Афсуски, ҳозирги кунда ушбу тенденциялар ўзгарди, биз COVID-19 пандемияси учинчи тўлқинининг дастлабки босқичидамиз», — деди у.
Ташкилот раҳбарининг таъкидлашича, дунё бўйлаб касалланиш сони кетма-кет тўртинчи ҳафтада ўсиб бормоқда, шунингдек, вирусдан вафот этаётганлар сони ўн ҳафталик пасайишдан сўнг яна орта бошлади.
Гебрейесус бундай ўсишга асосий туртки коронавируснинг дельта («ҳиндча») штамми тарқалиши эканини айтди. Унинг сўзларига кўра, одамлар фаоллигининг ошгани, шунингдек, мамлакатларнинг соғлиқни сақлаш ва аҳолини ҳимоя қилиш соҳасидаги чора-тадбирлардан изчил фойдаланмаётгани туфайли вазият янада оғирлашмоқда.
«Дельта варианти ҳозирда 111 дан ортиқ мамлакатларда қайд этилган, у тез орада COVID-19’нинг бутун дунёда айланиб юрадиган устувор штаммига айланиши кутилмоқда», — таъкидлади Гебрейесус.
Шунингдек, у вакциналарнинг мамлакатлар бўйича нотекис тақсимланишига эътибор қаратди ва буни «ҳайратда қолдирадиган номутаносиблик» деб атади. Унинг сўзларига кўра, шу сабабли дунёнинг турли бурчакларида пандемия икки хил йўл билан ривожланмоқда: вакциналарга эга бўлган мамлакатлар чекловларни бекор қилмоқда, аммо эмланмаган гуруҳлар катта хавф остида, вакцина олиш қийин бўлган мамлакатларда аҳолининг аксарияти инфекцияга қарши ҳимоясиз бўлиб қолмоқда.
«Мен сентябрга қадар ҳар бир мамлакат аҳолисининг камида 10 фоизини, шу йил охиригача камида 40 фоизини ва келаси йилнинг ўрталарига қадар камида 70 фоизини оммавий эмлашга чақирдим. Ушбу мақсадларга эришиш учун бизга 11 миллиард доза вакцина керак бўлади», — деди ЖССТ раҳбари.
Изоҳ (0)