Тошкентда 15—16 июль кунлари бўлиб ўтадиган халқаро конференцияда иштирок этиш учун Ўзбекистонга келаётган Туркия ташқи ишлар вазири Мевлут Чавушўғли ўз сафарини Фарғонадан бошлаши ҳақида хабар берилган эди. Вазир 14 июль куни Фарғонага етиб келди.
Туризм ва спорт вазирининг ахборот сиёсати масалалари бўйича маслаҳатчиси Лола Раҳманбаеванинг маълум қилишича, уни Фарғона шаҳри халқаро аэропортида маданият вазири Озодбек Назарбеков ҳамда Туризм ва спорт вазирининг биринчи ўринбосари Улуғбек Азамов кутиб олди. Ташриф давомида уларга, шунингдек, икки томоннинг фавқулодда ва мухтор элчилари ҳамроҳлик қилмоқда.
Мевлут Чавушўғли Фарғонада Марғилондаги Ҳунармандлар маркази, Қўштепа туманидаги қовунчилик далалари, Қўқондаги Худоёрхон саройи ҳамда Жоме мажмуаси билан танишади. Шу куни кечқурун Мевлут Чавушўғли Фарғонага ташрифини якунлаб, «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференцияда иштирок этиш учун Тошкентга учиб кетади.
Ушбу халқаро конференцияда Афғонистон ва Покистон президентлари, шунингдек, Европа иттифоқининг ташқи ишлар ва хавфсизлик сиёсати бўйича олий вакили, Еврокомиссия вице-президенти Жозеф Боррел, 20 дан зиёд мамлакат ташқи ишлар вазирлари, нуфузли халқаро ва минтақавий ташкилотлар раҳбарлари иштирок этиши кутилмоқда. Иштирокчиларнинг умумий сони 600 дан ортиқ.
Форумнинг асосий мақсади Марказий ва Жанубий Осиё давлатлари ўртасидаги тарихан яқин ва дўстона алоқаларни, ишонч ва яхши қўшничиликни икки минтақа халқлари ва мамлакатлари манфаатлари йўлида мустаҳкамлашдан иборат.
Маълумот учун, бу Туркия ташқи ишлар вазири Мевлут Чавушўғлининг Ўзбекистонга иккинчи ташрифи бўлиб, бундан олдин у 2021 йилнинг 6—9 мартида Хива, Самарқанд, Бухоро ва Тошкент шаҳарларида бўлган.
Изоҳ (0)