Фарғона вилояти Бувайда туманида ўзини поезд остига ташламоқчи бўлган аёл Транспортда хавфсизликни таъминлаш бошқармаси ППХ ходими томонидан ушлаб қолинди. Бу ҳақда бошқарма матбуот хизмати хабар берди.
Маълум қилинишича, 11 июль куни соат 22:30 ларда Фарғона вилояти ИИБ Транспортда ХТБга Қўқон—Бувайда темир йўл бекатлари оралиғининг 22-километрида Жилва қишлоғида яшовчи Ў.З. исмли фуқаро ўзини поезд остига ташламоқчи бўлган вақтида ТХТБ ППХ ходими уни ушлаб қолгани тўғрисида хабар келиб тушган.
Олиб борилган суриштирув ишлари натижасида фуқаро Ў.З. ҳақиқатан ҳам оилавий жанжал туфайли ўз жонига қасд қилмоқчи бўлгани аниқланган.
Шундан сўнг ушбу фуқаро билан ота-онаси, маҳалла раиси ва маҳалла фаоллари иштирокида профилактик суҳбат ўтказилиб, тушунтириш ишлари олиб борилган. «Жилва» маҳалла фуқаролар йиғини раисининг хотин-қизлар масалалари бўйича ўринбосари мураббий этиб бириктирилган.
Аввалроқ Тошкентда эри билан жанжаллашган аёл электр узатиш устунига чиқиб, жонига қасд қилмоқчи бўлгани, Ангрен шаҳрида ИИБ ходими ўз жонига қасд қилгани, Фарғонада эри билан жанжаллашиб қолган 22 ёшли аёл ўзини Катта Фарғона каналига ташлаб, чўкиб кетгани тўғрисида хабар берилганди.
Изоҳ (0)