Фарғона вилоятининг Риштон туманида отасига алимент тўлашдан бўйин товлаган шахсга нисбатан жиноят иши қўзғатилди. Бу ҳақда «Дарё»га МИБ вилоят бошқармаси ахборот хизмати маълум қилди.

Қайд этилишича, мажбурий ижро бюроси Риштон туман бўлими иш юритувига фуқаролик ишлари бўйича Риштон туманлараро судининг буйруғига асосан қарздор Ф.Б.дан ундирувчи О.Б. фойдасига алимент ундириш ҳақидаги ижро ҳужжати келиб тушган.

Мазкур ижро ҳужжати ўғилдан отага алимент ундириш ҳақида бўлиб, қарздор Ф.Б. собиқ турмуш ўртоғи билан ажрашгани учун унинг икки нафар вояга етмаган фарзандини отаси ўз қарамоғига олган. Бироқ болаларнинг отаси — бобонинг ўғли болаларининг моддий таъминотига умуман эътибор қаратмаган.

2020 йил январь—сентябрь ойлари учун юзага келган 8 миллион 140 минг 468 сўм алимент пулини фарзандлари таъминоти учун ўз отасига тўлаб беришдан очиқдан очиқ бўйин товлаган ўғил 2020 йил 6 октябрда Риштон туман маъмурий суди қарорига асосан Маъмурий жавобгарлик тўғрисидаги кодекснинг тегишли моддаларида кўрсатилган ҳуқуқбузарликни содир этган деб топилиб, унга 15 сутка қамоқ жазоси тайинланган.

Бироқ қарздор 2020 йил октябрь ойидан 2021 йилнинг июль ойига қадар ҳам ҳисобланган 8 миллион  728 минг сўм, умумий ҳисобда 16 миллион 868 минг сўм алимент пулини отаси О.Б.га тўламасдан келган ва у билан ўтказилган суҳбат жараёнида алиментни тўламаслигини маълум қилган.

Шундан сўнг 2021 йилнинг 29 июнь куни қарздор Ф.Б.га нисбатан Жиноят кодекснинг 122-моддаси 1-қисми (вояга етмаган ёки меҳнатга лаёқатсиз шахсларни моддий таъминлашдан бўйин товлаш) билан жиноят иши қўзғатилиб, ҳозирда суриштирув ҳаракатлари олиб борилмоқда.