Andijonda aliment to‘lashdan bo‘yin tovlagan olti nafar erkak 15 sutkaga qamaldi

Andijon viloyatining Jalaquduq tumanida voyaga yetmagan farzandlari uchun to‘lanishi lozim bo‘lgan aliment pulini o‘z vaqtida to‘lamagan olti nafar ota 15 sutkaga qamaldi. Bu haqda “Daryo”ga MIB viloyat boshqarmasi axborot xizmati ma’lum qildi.

Ma’lum bo‘lishicha, Fuqarolik ishlari bo‘yicha Xo‘jaobod tumanlararo sudining 2014-yil 25-apreldagi qaroriga asosan qarzdor N.X. hisobidan undiruvchi G.B. foydasiga voyaga yetmagan bir nafar farzandining moddiy ta’minoti uchun oylik topgan daromadining 25 foizi miqdorida aliment undirish belgilangan.

MIB Jalaquduq tuman bo‘limi xodimlari tomonidan ijro harakatlari davomida qarzdor bir necha marotaba og‘zaki va yozma ravishda ogohlantirilishiga qaramasdan voyaga yetmagan farzandini moddiy ta’minlashdan bo‘yin tovlagan otaning alimentdan 10 million so‘m qarzdorligi kelib chiqqan.

Shuningdek, Fuqarolik ishlari bo‘yicha Xo‘jaobod tumanlararo sudining 2013-yil 26-sentabrdagi qaroriga asosan B.U. voyaga yetmagan uch nafar farzandini moddiy ta’minlashdan bo‘yin tovlab, undiruvchilar — M.A.ga shu kunga qadar 4 million 428 ming, M.T.ga esa 1 million 354 ming so‘m miqdordagi aliment pullarini to‘lamagan.

Shu kabi holat fuqaro S.Ya. tomonidan ham sodir etilgan bo‘lib, u voyaga yetmagan ikki nafar farzandini moddiy ta’minlashdan qasddan bo‘yin tovlab, jami 9 million 558 ming so‘m miqdordagi aliment pullarini to‘lamagan.

Mazkur holatlar bo‘yicha to‘plangan ish hujjatlari ham jinoyat ishlari bo‘yicha Jalaquduq tuman sudiga yuborilgan bo‘lib, sud jarayonida N.X., B.U., S.Ya. va yana uch nafar alimentdan qarzdorga Ma’muriy javobgarlik to‘g‘risidagi kodeksning 47-4-moddasi (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) bilan 15 sutka qamoq jazosi tayinlangan.