Аҳолига тарқатиладиган газ баллонларни ўзлаштирган «Шофирконтумангаз» ходимига нисбатан жиноят иши қўзғатилди. Бу ҳақда Бош прокуратура ҳузуридаги департамент матбуот хизмати хабар қилди.
Маълум қилинишича, департаментнинг Шофиркон туман бўлими томонидан ўтказилган терговга қадар текширувда, «Шофирконтумангаз» суюлтирилган газ баллон ўрнатиб бериш хизмати ходими Қ.С. ўзининг моддий жавобгарлигида бўлган 105 дона умумий қиймати 34,1 миллион сўмлик маиший газ баллонларни аҳолига тарқатмасдан талон-торож қилгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Жиззахда 123 миллион сўм кредит маблағларни талон-торож қилиб ўзлаштирган раҳбарга жиноий иш қўзғатилгани, Бухорода вояга етмаган икки қиз ўзганинг хонадонидан кондиционер ўғирлагани ҳамда «Ўзбекистон темир йўллари» метро қурилишида 899 миллион сўм талон-торож қилинишида компаниянинг алоқаси йўқлигини маълум қилгани ҳақида хабар берилганди.
Изоҳ (0)